Сүүлийн үед парламентад суудалтай улс төрийн намууд буюу АН, МАН, МАХН-ынхан хэсэг бүлгээрээ энд тэнд цуглан уулзацгааж байна. Зарим нь албан ёсны уулзалтуудыг зарлан хуралдуулж байгаа бол зарим нь нууцаар уулзалдаж байгаа сурагтай.

Тодруулбал, эдгээр өдрүүдэд МАН-ынхан бүсийн зөвлөлгөөнөө хийж байгаа юм байна. Уг уулзалтаар дараагийн сонгуульд хэрхэн, яаж оролцох талаараа төлөвлөгөө боловсруулж байгаа гэнэ. Мөн  АН-ыг дотроо задраад дуусч байгаа учир алдаан дээр нь дөрөөлж ашигтай ажиллах тактикаа ч тэд боловсруулж байгаа аж. Ямартай ч тус зөвлөлгөөнөөс эвтэй байх ёстой гэсэн тунхаглал гарч буй талаар эх сурвалж мэдээллээ.

Мөн УИХ-ын гишүүн асан У.Хүрэлсүхийн тэргүүлдэг Зүүний хүчний холбоо ч Сэлэнгэд хуралджээ. Сүүлийн хэдэн жил нам гүм байсан У.Хүрэлсүх гэнэт гарч ирэн хурал зарлан хуралдуулж буй нь ямар учиртай вэ гэж ярих хүмүүс байна. Тэгвэл түүнийг удахгүй байгуулагдаж магадгүй хамтарсан Засгийн газарт аль нэг сайд нь болж албан тушаалд очихоор бэлтгэж ийнхүү гарч ирж байна хэмээн зарим эх сурвалжууд хэлж байна. 

МАН-ынхны хувьд иймэрхүү байдалтай байгаа бол АН-ынхан ч мөн нууц уулзалтуудаа зохион байгуулж эхэлсэн гэнэ.

АН-ын гишүүн “Женко” Х.Баттулгын тэргүүлдэг МОАХ-ынхан саяхан уулзалджээ. Мөн хэд хоногийн өмнө УИХ-ын дарга З.Энхболдын фракц ч уулзалт зохион байгуулсан.

Харин Н.Энхбаярын тэргүүлдэг МАХН анхан шатны байгууллагууддаа бэхжүүлэх зорилготойгоор хөдөө, орон нутгуудаар явж байгаа талаар тус намын Ерөнхий нарийн бичгийн дарга Г.Шийлэгдамба ярьсан. Энэ мэтээр намууд тэр дундаа нам доторх бүлэг фракцууд бүгд хуралдаад эхэллээ.

Тасралтгүй үргэлжлэх нам фракцуудын хурал юуг өгүүлж байгаа нь олны анхаарлыг ихээхэн татаж байна. Энэ бол Монголын төрд ямар нэгэн зүйл болох гэж буйгийн шинж. Удахгүй намрын чуулган эхэлнэ. Үүний дараагаар УИХ-д дийлэнх олонхийг бүрдүүлж буй АН, МАН хоёр дахин хамтарсан Засгийн газар байгуулж магадгүй гэсэн яриа байгаа. Харин дээрх фракцийнхан бүгд хамтарсан Засгийн газарт албан тушаал горьдож буй учир аль эртнээс арга, тактикаа боловсруулж эхэлж буй нь энэ аж.