Сүүлийн үед инженер Ц.Батыг сайд А.Гансүх гомдол гарган хориулсан нь ихээхэн асуудал үүсгэлээ. Энэ маргаан дундуур нийтлэлч Баабар орж ирсэнээр цар хүрээг нь улам өргөн болгож орхилоо. Учир нь нийтлэлч Баабар Зам тээврийн сайд А.Гансүхийн талаар авлига, хээл хахууль гэмт хэргийн шинжтэй зүйлийг олон нийтийн сүлжээгээр дамжуулан задалж орхилоо. Тухайлбал тэрээр “Одоо жапан таунаас луйвардаж авсан хэд хэдэн байртай. Гүтгэсэн гээд намайг шоронд хийг л дээ”, “Твитрээр цуурсан Бат биш уг нь иймэрхүү хулгайч луйварчин нар шоронд очих ёстой юм л даа”, “Жапан тауны хөрөнгө оруулагч өвгөнийг буудалд байхад нь өрөөнөөс нь хар тамхи оллоо гэж цагдаагаар бариулдаг нь наад шаар чинь”, “Хөрөнгийг нь булааж авах гээд байрыг зарахад туслах компани байгуулчихаад эзнийг нь шоронд хийж хөөж гаргах гэж санаархжээ” гэх мэтээр цахим хуудсаар дамжуулан бичив. Өөрөөр хэлбэл нийтлэлч Баабар Монголчуудын мэдэхгүй олон зүйлийг ил болголоо. Японы хөрөнгө оруулалттай “Japan town” гэдэг байгууламж талийгаач Ж.Наранцацралтыг Барилга хот байгуулалтын сайд байх үед эхэлж байсан юм. Дуулиантай эхлээд эзэн япон өвгөн нь хар тамхи хэрэглэсэн гэж бичигдээд сураг алдарсан энэ байгууламжийн цаад учиг тайлагдаж байх шиг.

    Энэхүү үйл явдлыг АТГ, ЦЕГ-ынхан өчигдөрөөс эхлэн ихэд анхааран судлах болсон гэж эх сурвалж мэдээллээ. Өөрөөр хэлбэл Монголын нөлөө бүхий хүн Засгийн газрын нэг сайдыг гэмт хэрэгтэн, авлигачин байсан мэтээр нэрлэж байхад хууль хүчний байгууллагынхан чимээгүй суухгүй л дээ. Эх сурвалжийн мэдээлж байгаагаар бол нийтлэлч Баабарын цахим хуудсанд бичиж байгаа зүйлийг хуулийн байгууллагынхан эд мөрийн баримт болгон баталгаажуулж байгаа сураг гарлаа.

    Тэгэхээр АТГ, ЦЕГ-ынхан илэрхий хууль бус зүйлийг олон нийтэд дэлгээд байхад чимээгүй юу ч сонсоогүй царайлаад, чихээ бөглөөд суугаагүй бололтой. Асуудалд нилээд соргогоор хандаж эхэлжээ.
    Хэрэв энэхүү мэдээлэл үнэн бол ЦЕГ, АТГ нийтлэлч Баабарын олон нийтэд цахим хуудсаар дамжуулан түгээж байгаа мэдээлэлийн үнэн худлыг шалгах нь гарцаагүй. Олон нийт ч ингэж шахаж шаардах нь тодорхой. Тэгэхээр хуулийн байгууллагынхан яригдаад байгаа асуудлыг нарийвчлан шалгах бололтой.

    Магадгүй А.Гансүх сайд нэр төрд халдсан гэдэг үндэслэлээр нийтлэлч Баабарыг шүүхэд өгч, хэвлэлийн бага хурал хийж мэдээлэл өгч мэдэх юм. Эсвэл нийтлэлч Баабар бичээд байгаа зүйлийнхээ үнэнийг би гэрчилнэ гээд хуулийн байгууллагад мэдээлэл гаргаад өгч ч болох юм.
    Ямар ч гэсэн Зам тээврийн сайд А.Гансүх, нийтлэлч Баабар хоёрын асуудал хуулийн байгууллагынхны анхаарлыг ихэд татаж эхэллээ. Харин өрнөл хийгээд төгсгөл нь ямар байхыг хэлэхэд эрт юм.