“Гарьд магнай” кинон дээр Очир заан, Далайцэрэн хоёр “Бид ч энэ умгар гэрт  багтахгүй. Ханын шийр зад тийрчихнэ. Уужимханаар нь хангайгаа бараадья даа” гэж хэлээд гадаа хонохоор явчихдаг. Түүн шиг АН-ынхны дотоод тэмцэл саарал ордондоо багтахаа болив.

Тэд нэгэнт саарал ордонд багтаж шингэхгүйгээс хойш гудамжиндаа гарцгаая гэж ярьж эхэлсэн байна.  Учир нь АН-ынхан дотоод зөрчил тэмцэлдээ ТЕГ, АТГ, ЦЕГ, Прокурор гээд хүчний бүхий л байгууллагуудыг татан оруулж ирэв. Ингээд үзвэл АН-ын тэмцэл нилээд гүн гүнзгий ужиг шинжтэй болов.

Хамгийн сүүлд УИХ-ын гишүүн Ж.Батзандан ардчилсан намынхаа гишүүдийг хөдөлгөөнд орох цаг болсныг уриалав. Тэрээр “АН-д ардчилал байхгүй болсон. АН дотооддоо ялзарч дууссан. Их хурал, ҮЗХ-гоо хуралдуулах ёстой. АН-ын Их хурал дөрвөн жил тутам хуралдах ёстой байтал зургаа, долоон жилд нэг ч хуралдсангүй. ҮЗХ жилд хоёр удаа хуралдах ёстой. Хуралдалгүй хоёр гурван жил боллоо. Хууль журамаа зөрчдөг ийм даргатай улс орон өөдөлнө гэдэгт би итгэхгүй байна. Тиймээс АН-ын гишүүд хөдөлгөөнд орох шаардлагатай” хэмээн байр сууриа илэрхийлэв. Үнэхээр эрх баригч нам нь өөрсдийнхөө дүрэм журамыг биелүүлэхгүй байна гэдэг бол хэцүү л дээ.

Сүүлийн нэг жилийн турш АН-ын гишүүд ҮЗХ-гоо хуралдуулахыг шаардах болсон. Жилд хоёр удаа хуралдах ёстой ч сүүлийн гурван жилд нэг ч удаа хуралдахгүй хойшлуулаад бултуулаад байна гэдэг бол үнэхээр том асуудал үүссэний илрэл л дээ. Бас дөрвөн жил тутам хуралдах ёстой Их хурлаа сүүлийн долоон жил хуралдуулаагүй байна гэдэг ч байдал хүндрээд байгаагийн илэрхийлэл. МАН хичнээн муулуулдаг ч гэсэн хугацаандаа Их, Бага хурлаа хийгээд асуудлаа яриад ирсэн. Харин эрх баригч АН-д ийм улс төрийн соёл байхгүй бололтой. Тийм учраас л шударга гэгдэх УИХ-ын гишүүд нь жирийн гишүүдээ хөдөлгөөнд орж, бослого тэмцэлд уриалаад байгаа хэрэг. Ж.Батзандангийн Их хурал, ҮЗХ-гоо хуралдуулах гэсэн санаачилгыг олон хүн дэмжиж ирсэн. Нөхцөл байдал ингэж хүндэрсэн учир Ж.Батзандан гишүүн Их хурал, ҮЗХ-гоо хуралдуулахгүй бол намын удирдлагуудаа шүүхэд өгөх болно гэдэгээ ч мэдэгдэв. Үнэхээр АН-ын удирдлагууд нь хурлаа дүрмийн дагуу хийхгүй бол гишүүд нь шүүхэд өгч түмний өмнө зөв буруугаа шүүлгэхээр хуулийн байгууллага руу хөтөлцөөд алхах нөхцөл байдал үүслээ. 

Үүнээс гадна УИХ дахь АН-ын гишүүд өнгөрсөн хоёр жилийн хугацаанд бүлгийн дарга Д.Эрдэнэбатыгаа олны өмнө шүүмжилж байсан удаагүй. Тэгвэл саяхан УИХ-ын гишүүн Ж.Батзандан “Манай бүлгийн дарга бол бөөрөнхий хүн. Өөрийн толгойгүй хүн. Тэр хүний үгэнд итгэх хэрэггүй” хэмээн зарлав. Өөрөөр хэлбэл УИХ дахь АН-ын бүлгийн гишүүд нь даргыгаа шүүмжилж эхэллээ. Бас итгэж болохооргүй, өөрийн гэсэн толгойгүй хүн болохыг зарлаатхав. АН-ын энэ бүх дотоод зөрчил юунд хүрч дуусахыг хэлэхэд эрт байна даа.