УИХ-ын гишүүн О.Баасанхүү, Ж.Батзандан нар өнөөдөр ЦЕГ-ын шинэ дарга С.Баатаржавтай уулзахаар болсоноо твиттер хуудсаараа дамжуулан хэллээ. Тэд ажлаа хүлээн аваад удаагүй байгаа С.Баатаржавтай нэгэн тендертэй холбоотой асуудлаар уулзах юм байна. Тэрбээр Хууль зүйн сайд Х.Тэмүүжинтэй холбоотой гэгддэг "Смарт солушн" компанийн тендерийг С.Баатаржав шалгаруулсан гэж үзэж байгаа бөгөөд энэ талаар тодруулахыг хүсч байгаа аж. О.Баасанхүү гишүүн доорх хурлын тэмдэглэлийг С.Баатаржав хөтөлсөн, шалгаруулахад оролцсон нь үнэн эсэх талаар асууна гэдгээ хэллээ. Хэрэв энэ үнэн бол ЦЕГ-ын шинэ дарга Х.Тэмүүжингийн гэх "Смарт солушн"-д тендер олгосноороо энэ албан тушаалд суусан гэх хардлага байгаа бололтой.