Монгол Улсын Ерөнхий сайд Н.Алтанхуяг өчигдөр буюу есдүгээр сарын 08-ний оройн 21:00 цагаас МҮОНТВ-ийн эфирээр нийт ард иргэддээ хандаж үг хэллээ. Тэрээр Шинэчлэлийн Засгийн газрын хоёр жилийн хугацаанд хийсэн ажлыг товч тайлагнаад “Шинэчлэлийн Засгийн газрын чадамж хүч бололцоо шавхагдах болоогүй байна” гэж байр сууриа илэрхийллээ. Түүний энэ удаагийн үг нэлээд нягт нямбай, бодож боловсруулсан, шийдмэг байсан гэж ажиглагчид дүгнэж байна.

    Мөн тэрээр улс төрийн хүрээнд үүсээд байгаа нөхцөл байдалтай холбогдуулж  “Ордны хуйвалдаанаас илүү олон нийтийн санаа бодолд тулгуурлаж ажиллахыг санал болгож байна. Олон нийтийн олон судалгааны үр дүнгээр улстөрийн тогтвортой байдал эдийн засгийн хүндрэлийг даван туулах гол нөхцлүүдийн нэг гэж дийлэнхи олонхи нь үзсээр байна. Гэхдээ энэ нь хариуцлагаас мултрах, ажлаа эрчимжүүлэх, асуудлаа шийдвэрлэхээс бултах арга зам биш. Шинэчлэлийн Засгийн газар илүү хурдтай, илүү эрчтэй, нягт нямбай, өндөр хариуцлагатай шинэ эрч хүчтэй ажиллахын тулд Засгийн газрын танхимын сэлгээ хийх асуудлыг миний бие удахгүй эхлэх УИХ-ын намрын ээлжит чуулганы эхээр санаачлан оруулж шийдвэрлэнэ гэдгээ зарлаж байна. Засгийн газрын танхимын сэлгээнд зарим сайдын суудлаас гадна засгийн газрын бүтцийн асуудлыг хамтад нь оруулж шийдвэрлэх болно” гэж хэлсэн нь цаг үеийн халуун сэдэв болоод байна.

    Эх сурвалжын мэдээллэж байгаагаар Засгийн газарт бүтцийн өөрчлөлт оруулах, сайдыг албан тушаалаас чөлөөлөх асуудлаар нэгдмэл байр суурьтай болсон байна. Тодруулбал Ц.Оюунгэрэл сайд өөрийн хүсэлтээр үүрэгт ажлаасаа чөлөөлөгдөж Соёл спорт аялал жуулчлалыг яамыг татан буулгах бол бүтцийн өөрчлөлтөөр Эдийн засгийн хөгжлийн яамыг татан буулгаж Н.Батбаяр сайд ажлаа өгнө гэв. Мөн зам тээврийн сайд А.Гансүхийг Засгийн газрын бодлогыг биелүүлэхээс татгалзсан, төмөр замын төслийг урагшлуулаагүй гэдэг үндэсллээр үүрэгт ажлаас нь чөлөөлж магадгүй гэсэн мэдээлэл тараад байна.