Шинэчлэлийн Засгийн газрын тэргүүний ард түмэнд хандаж хэлсэн үг олны анхаарлыг татаж байна. Энэ хирээрээ ихээхэн маргаан мэтгэлцээнийг өрнүүлэх болов. Ерөнхийдөө Шинэчлэлийн засгийн газар юу хийсэн, юу хийхээс илүүтэй дараагийн Засгийн газрын бүтэц ямар байх талаар янз бүрийн санал бодлыг уралдуулан дэвшүүлэх болов. Ерөнхий сайд Н.Алтанхуяг үргэлжлүүлэн ямар бүтцээр, хэн гэдэг сайдуудтайгаа цаашаа явж харин замаасаа хэнийг баяртай гэх вэ гэдэг л саарал ордны ярианы сэдэв болж байна. Олон нийтийн ч, ардчилсан намын гишүүдийн ч сонирхолыг татаж эхлэв.

Зарим хүмүүс түүний цаашид шинэ бүтцээр ажиллана гэсэн шийдвэрийг тун мэргэн санаа гэж байгаа бол нөгөө хэсэг нь хэзээний л ингэсэн бол өөрт нь ч, АН-д ч хэрэг болох байсан хэмээн тайлбарлах болов. Ямартай ч тэрээр АН-аас хамгийн удаан Ерөнхий сайдын албыг хашиж байгаа хүнээр түүхэнд үлдэхээр боллоо гэж М.Энхсайхан хэлэв. Н.Алтанхуягийн улстөрийн мэдрэмж, багийн эрх ашгийг тэнцвэржүүлэх чадварыг бусадтай зүйрлэхийн аргагүй ажээ. Цагаа олж АН-ын дарга болсон, цагаа олж хамтарсан Засгаас гарсан, цагаа олж бүтцийн өөрчлөлтийн асуудлыг ярьж байна гэж намынхан нь ярих боллоо. Ямартай ч тэр зөөлөн чихэр биш, хашир туршлагатай улстөрч болсноо үйлдлээрээ баталлаа.

Эх сурвалжийн мэдээлж байгаагаар бол АН-ын дарга, Ерөнхий сайд Н.Алтанхуяг Эдийн засгийн хөгжлийн сайд Н.Батбаяр,  Соёл, спорт аялал жуулчлалын сайд Ц.Оюунгэрэл, Зам тээврийн сайд А.Гансүх гэсэн хүмүүсийг ачаа тээшээ бэлдэхийг үүрэг болгосон гэнэ. Тэгээд ч Ц.Оюунгэрэл өөрийн хүсэлтээр сайдын ажлаа өгөх гэж байгаа гэсэн яриа ч өргөн тархсан байна. Гэхдээ Н.Батбаяр, Ц.Оюунгэрэл хоёрыг огцруулна гэдэг их л эргэлзээтэй. Харин А.Гансүхийг бол хамгийн түрүүнд дуун дээр нь явуулна.

Үүний зэрэгцээ АН-аас 3-4 сайдаа явуулна гэвэл "Шударга ёс" эвсэл нэг сайдаа явуулах ёстой талаар Шадар сайд Д.Тэрбишдагватай ярилцжээ. Д.Тэрбишдагва ч толгой дохисон бололтой. Ингээд "Шударга ёс" эвсэлийнхэн хоёр хүн дээр тогтож ярилцжээ. Нэгд Сангийн яам, Эдийн засгийн хөгжлийн яам хоёрыг нэгтгээд Н.Батбаярыг сайдаар нь үлдээнэ гэвэл Ч.Улаан автоматаар мултарна. Бас Эрүүл мэндийн сайд Н.Удвалыг ч гэсэн чөлөөлж болох юм гэж ярилцжээ. Учир нь түүнийг сайд болсноос хойш эрүүл мэндийн салбарын хэл ам татраагүй, салбараа сайн удирдаагүй гэх мэт олон тодотгол дагалдана. Ингэж тооцвол Н.Удвал ч мултрах магадлал өндөр юм. Ингэж тооцвол "Шударга ёс" эвсэлээс Ч.Улаан, Н.Удвал хоёрын хэн нэг нь сайдын суудлаасаа салах бололтой.

Гэхдээ Ц.Оюунгэрэл хүсэлтээрээ ажлаа өгөөд, Н.Удвалыг чөлөөлж орхивол Н.Алтанхуягийн Засгийн газар муухай харагдана. Учир нь танхимынхаа гурван эмэгтэй сайдын хоёрыг нь хөөгөөд явуулбал нийгэмд таатай ойлгогдохгүй. Тэгэхээр үүнийг тэд мэдээж тооцоолно. Эсвэл тэдний оронд М.Батчимэгийг ч зөрүүлээд сайд болгох магадлал өндөр юм.

Өөр нэгэн эх сурвалжийн мэдээлж байгаагаар бол Н.Алтанхуяг Зам тээврийн сайд А.Гансүх, Эрүүл мэндийн сайд Н.Удвал хоёрыгоо л чөлөөлнө. Тэгээд Зам тээврийн яамыг Барилга хот байгууллатын яамтай нэгтгэнэ. Харин Эрүүл мэндийн яамыг С.Эрдэнээгийн яамтай нэгтгэнэ. Ингээд Шинэчлэлийн Засгийн газрын шинэчлэл дуусна. Өөр ямар нэгэн шинэ зүйл болохгүй. УИХ-ын гаднаас сонгогдсон хоёр сайдаа явуулна. Харин УИХ-ын гишүүн сайдуудаас огтхон ч сугалахгүй гэж тайлбарлаж байна. Энэ бодит байдалд илүү нийцсэн дүгнэлт ч байж болох юм.

Хэрэв Н.Батбаяр, Ц.Оюунгэрэл хоёрыг бүтэц нэрээр явуулбал тэдэнтэй тохирох хэрэгтэй болно. Тэд ч эртнээс энэ асуудлыг ярилцаж тохироцлоонд хүрсэн. Тэрхүү тохироо нь 2016 онд тэднийг жагсаалтын эхэнд бичиж автоматаар УИХ-ын гишүүн болгоно гэсэн яриа юм. Энэ ч бас байж болох хувилбар, тохироо.
   
Ийнхүү Засгийн газрын дараагийн бүтэц ямар байх талаар маш олон янзын хувилбар яригдаж байна. Бас олон янзын тохироо хөвөрч эхлэв. Намрын чуулган эхэлтэл яригдах хамгийн чухал асуудал Шинэчлэлийн Засгийн газрын шинэ бүтэц байхаар боллоо.