Өнгөрсөн хавар сөрөг хүчин болох МАН-ын бүлгийн зарим гишүүд Засгийн газрын бүтцийг өөрчилж, яамдын тоог цөөлж, зарим хариуцлагагүй сайд нарыг огцруулах асуудлыг эрчимтэй хөндөж эхэлсэн. Харамсалтай нь МАН-ынхан зөвхөн сайд нарыг огцруулах асуудалд анхаарлаа хандуулаад яамдын бүтцийг өөрчлөх, тоог нь цөөлөх асуудлаар тодорхой санаачилга гаргаагүй орхисон юм. Сөрөг хүчний үлдээсэн энэхүү орон зай дээр Засгийн газрын тэргүүн Н.Алтанхуяг чадварлаг тоглолтыг үзүүлэв. Тиймээс МАН-ынхан бид хавраас яамдын тоог цөөлье гэж ярьж байсан гэх мэтээр ярихгүй байна л даа. Тэгээд ч тэд тодорхой хуулийн төсөл санаачилгууд гаргасангүй. Харин өргөн хэмжээний шүүмжлэлийг өрнүүлсээр ирсэн билээ.

    Одоо олон нийт Н.Алтанхуягийн гарт ямар хөзөр байгаа, хэн гэдэг сайд нараа үдэж мордуулах бол гэсэн таамаглал дунд төөрөөд засгийг шүүмжлэхээ болив. Тийм ч учраас ЗГХЭГ-ын дарга Ч.Сайханбилэг “Ерөнхий сайдаас бусад бүх хүн таамаглах эрхтэй шүү дээ” хэмээн байр сууриа илэрхийлсэн. Үнэхээр Ерөнхий сайдаас бусад бүх хүн л засгийн дараагийн бүтцийн талаар таамаглал дэвшүүлэх болов.

    Эх сурвалжийн мэдээлж байгаагаар бол Н.Алтанхуяг ямар сайд нараа явуулахаа бараг өөрсдтэй нь ярилцаад тохирсон гэнэ. Хэн хэнийг явуулах гэж байгааг ч Н.Алтанхуягийн багийнхан сайн мэдэж байгаа аж. Одоо сүүлийн тохироонуудаа л хийж байгаа бололтой.

    Саяхан ЗГХЭГ-ын дарга Ч.Сайханбилэг яриа өгөхдөө “Заавал сөрөг хүчнээр шаардуулалгүйгээр хариуцлага тооцох асуудлаа бид бүлэг дотроо ярьж шийдээд явж болно шүү дээ” гэсэн юм. Өөрөөр хэлбэл сөрөг хүчний шаардлагаас өмнө Засгийн газрын тэргүүн нүүдэл хийсэн. Ирэх арван сараас өмнө эрх баригч АН-ын бүлэг хуралдах зар түгээж байна. Гэхдээ хэзээ гэдэг товоо зарлаагүй ч бүлгийн ээлжит бус хурал хийх нь ийнхүү тодорхой болов.  Бүлгийнхээ ээлжит бус хуралд Н.Алтанхуяг өөрийн Засгийн газрын шинэ бүтэцээ танилцуулахаар бэлдэж байгаа аж. Үндсэндээ тэрээр огцруулах сайд нартайгаа урьдчилан ярьж тохирчихоод, бүлэгтээ оруулж тулган шийдүүлэх бололтой. Нэгэнт сайд нартай нь тохироо хийчихээд бүлэгтээ оруулаад ирэхээр бусад нь нэг их эсэргүүйцэхгүй гэдгийг мэдээж Н.Алтанхуяг сайтар тооцсон хэрэг. Тэгээд л “МАН-ынхаан бид та нараар шаардуулахгүйгээр өөрсдөө санаачилгаараа асуудлаа шийдчихнэ” хэмээн урьдчилан даапаадаад байгаа хэрэг л дээ. Ингээд Н.Алтанхуяг МАН-ынхныг горьдоож байгаад бэрс гаргачих бололтой. Бүлгийнхээ гишүүдийг ч аргалаад эхэлж. Ингэснээр 2016 он хүртэл АН, “Шударга ёс” эвсэлийн нөхөрлөл бат бөх хэвээрээ үлдэх бололтой. Тэдний нөхөрлөл дээр бие даагчид гагнаас нэмж нэгдэнэ. Ингээд шинэчлэлийн Засгийн газарт нэг их зарчимын өөрчлөлт орохгүйгээр цаашаа явах хандлага ажиглагдаж эхэллээ. Харин муутгасан эдийн засгаа сэргээхгүй бол 2016 онд ганцхан суудалтай үлдэж ч мэдэх юм. Сөрөг хүчин МАН сайн тоглолтуудийг хийж чадвал шүү дээ.