УИХ-ын гишүүн О.Баасанхүү Х.Тэмүүжин сайдыг огцруулах асуудал дээр тууштай байр сууриа илэрхийлдэг нэгэн. Тэрбээр Х.Тэмүүжин сайдыг огцруулах хүсэлтийг удаа дараа тавьж байсан ч түүнийгээ эргүүлэн татсаныг та бүхэн санаж байгаа биз ээ.

Гэвч тэрбээр сайдыг огцруулах саналаа эргүүлэн тавина гэдгээ удаа дараа мэдэгдэж байсан. Тэгвэл сүүлийн үед  О.Баасанхүү гишүүнийг Х.Тэмүүжин сайдын хууль зөрчсөн үйлдлүүдийг Ерөнхий сайд Н.Алтанхуягт ил захидал хэлбэрээр илгээх гэж байгаа гэх шум тарлаа.

Тодруулбал, Замын цагдаагийн төхөөрөмж нийлүүлж багагүй асуудал дэгдээж, будлиан үүсгээд байсан “Смарт солюшнс” компанитай холбоотой тендерийн хууль бус үйлдэлд Х.Тэмүүжин сайдыг  хамааралтай байж болзошгүй хэмээгээд үүнийг хуулийн байгууллагаар шалгуулахыг шаардсан утгатай ил захидлыг Ерөнхий сайдад хүргүүлэх гэж байгаа сурагтай.

Дашрамд хэлэхэд, Ерөнхий сайд Н.Алтанхуяг өнгөрсөн удаад ард түмэндээ хандаж Засгийн газарт бүтцийн өөрчлөлт оруулна гэдгээ мэдэгдсэн. Тэгвэл бүтцийн өөрчлөлтөнд өртөж, суудлаасаа бууж болзошгүй хүмүүсийн нэрсийн жагсаалд Х.Тэмүүжин сайдын нэр цухас дурдагдсан байсныг хэлэх нь зүйтэй биз ээ.