Тойрогтоо ажиллаж буй УИХ дахь МАН-ын бүлгийн дарга С.Бямбацогт очсон сум бүрийнхээ намын хороодын гишүүдтэй уулзаж, жаргал зовлонг нь сонсож, зарим асуудлыг газар дээр нь шийджээ. Намын боловсон хүчнийг сургаж хөгжүүлэхэд дэмжлэг үзүүлэх, намын хороодын үйл ажиллагааг идэвхжүүлж, санхүүжилтийг тодорхой хэмжээнд шийдвэрлэх, эргэх холбоогоо сайжруулах, хамтын хариуцлагыг өндөржүүлэх зэрэг асуудал энэ удаагийн уулзалтын гол сэдэв байв. Ховдын баруун гурван сумын нэг Алтай сумын намын хороо шинэ удирдлагаа сонгоод удаагүй аж. Тус сумын 150 гаруй гишүүд, дэмжигчид оролцсон уулзалт, өдөрлөгт тэрээр оролцож, МАН-ын бүлгээс явуулж байгаа бодлого, үйл ажиллагааны талаар танилцуулав.
Мөн С.Бямбацогт гишүүн Ховд аймгийн Булган суманд ажиллах үеэрээ аймгийн Иргэдийн төлөөлөгчдийн хурлын нөхөн сонгуульд МАН-аас өрсөлдөж буй нэр дэвшигчээ дэмжин ард иргэдтэй уулзалт хийжээ. Аймагтаа хамгийн олон хүн амтай энэ сумын иргэд тулхтай, хариуцлагатай, итгэл даах чадвартай улс төрийн хүчнээс нэр дэвшсэн хүнийг дэмжинэ гэдгээ уламжилжээ. Мөн энэ үеэр нутаг орондоо нэр хүндтэй "Торгон нутаг" клубын тэргүүн О.Батнасан МАН-д элсэж, намын бодлого, үйл ажиллагааг дэмжиж ажиллахаа илэрхийлсэн байна. Нутаг орноо гэсэн сэтгэлтэй бүтээлч залуусын нэгдэл энэхүү клубээс Сорхагтани хатны цэцэрлэгт хүрээлэн, Увш хааны хөшөө, Галдан Бошигт хааны их өргөө, торгуудын биет биелгээ, Их агсал бүжгийн хөшөө зэргийг бүтээн байгуулж өгчээ.