УИХ дахь АН-ын бүлгийн дарга Д.Эрдэнэбат говийн аймгуудад дөрвөн өдрийн томилолттой ажиллаж байгаа билээ. Тодруулбал, УИХ-ын бодлого шийдвэрийг танилцуулах, намрын чуулганы хугацаанд хэлэлцэх хуулийн төслүүдээр иргэдийн санал бодлыг сонсох мөн томоохон бүтээн байгуулалт болох Сайншанд аж үйлдвэрийн цогцолбор, Оюутолгой, Тавантолгойн үйл ажиллагаа болон Замын-Үүд дахь эдийн засгийн чөлөөт бүс, Хилийн боомтын үйл ажиллагаатай танилцаж байгаа юм.
Тэгвэл, олонхийн бүлгийн дарга өчигдөр Сайншанд хотод ажиллалаа. Сайншанд хотод сүүлийн жилүүдэд бүтээн байгуулалтын ажил эрчимтэй хийгдэж байгаа ажээ. 1000 айлын орон сууц, зам талбайн өргөтгөл, шинэчлэл, сургууль, цэцэрлэг, цахилгаан станц гэх мэт олон ажил хийгдэж байгаа юм байна. Тиймээс бүлгийн дарга Сайншанд хотод хийгдэж буй бүтээн байгуулалтын ажилтай танилцсан юм.
Тэрбээр, “Нарлаг шанд” хорооллын үйл ажиллагаатай танилцлаа. Тус хорооллыг “Эвийн гэрээ” компани гүйцэтгэсэн бөгөөд нэг ам.метрийг нь 980 мянган төгрөгөөр борлуулж буй юм байна. Тус компанийн хувьд энэ жил өөрийн хөрөнгөөр бетон зуурмаг болон тоосгоны үйлдвэрийг байгуулж, барилгын материалыг өөрийн нутагтаа үйлдвэрлэж эхэлжээ.
Үүний дараа шинэчлэлийн Засгийн газраас хэрэгжүүлсэн аймаг бүрт баригдаж байгаа 1000 айлын орон сууцны ажилтай танилцсан юм. Тус аймагт барилгын ажил эхлээгүй ч дэд бүтэц замын ажлыг нь хийж эхэлжээ.
Дараа нь хоёр Засгийн газар дамжин яригдаж байгаа Сайншанд аж үйлдвэрийн паркийн ажилтай танилцсан бөгөөд уг цогцолборын ажил ямар шатанд яваа талаар ҮХААЯ-ны Хүнд үйлдвэрийн газрын дарга н.Ганболд мэдээлэл өгсөн юм. Өдөр бүр гангийн хэрэглээ нэмэгдэж байгаа өнөө цагт үйлдвэрт шаардлагатай хөрөнгө мөнгийг тусгаж өгөх ёстой хэмээж байгаа ч энэ жил зогсонги байдалд орж мөнгөгүй гэх шалтгаанаар ажил нь урагшлахгүй ыбайгаа аж. Тиймээс Сайншанд цаасан дээр бичигдсэн хэвээр хоёр засгийн нүүр үзжээ.
Уулзалтын дараа тэрбээр иргэдтэй уулзаж санал бодлыг нь сонссон бөгөөд Шанд нутгийнхан Чингис бондын санхүүжилтээр баригдсан Улаанбаатар-Замын-Үүд чиглэлийн автозамын бүтээн байгуулалтад сэтгэл хангалуун байна гэдгээ онцоллоо. Тэд төрийн тогтвортой байдлыг чухалчилж байгаа аж.