Өнгөрсөн долоо хоногт Засгийн газрын хэрэг эрхлэх газрын дэд даргын түр орлон гүйцэтгэгч Д.Цогт-Очир болон хэрэг эрхлэх газрын хоёр ажилтныг үүрэгт ажлаас нь чөлөөлсөн байна. Тэднийг Засгийн газрын дотоод нууц бичиг баримт болоод улсын нууцад хамаатай материалыг гадагш алдсан гэх үндэслэлээр халсан байх магадлалтай аж. Тодруулбал,  “Оросын төмөр зам” нийгэмлэгийн ерөнхийлөгч В.Якунин Монгол Улсын Ерөнхий сайд Н.Алтанхуягт бичсэн нууц захидал, Засгийн газрын зарим хэвлэл мэдээллийн хэрэгсэлтэй хийсэн хаалтын гэрээ, “Монос” группийн охин компани "Монос фарм трейд" хэмээх тоног төхөөрөмжийн компанийн 10.1 тэрбумын тендерийн мэдээлэл мөн өнгөрсөн долоо хоногт олны анхаарлын төвд байсан Ерөнхий сайд эхнэр, хүүхэдтэйгээ Солонгос улсад төсвийн мөнгөөр зугаалсан гэх баримтууд багтаж байгаа ажээ.