Гадаад харилцааны дэд сайд Д.Ганхуяг Монгол Улсад албан ёсны айлчлал хийж буй ХКН-ын Гадаад харилцааны хэлтсийн (яамны статустай байгууллага) дэд сайд Чэнь Фэнсяныг 9 дүгээр сарын 25-ны өдөр хүлээн авч уулзав.Уулзалтын үеэр талууд хоёр орны харилцаа, хамтын ажиллагаа, улс төрийн намуудын харилцаа, солилцоо, иргэд хоорондын харилцан итгэлцэл зэрэг асуудлаар санал солилцов. Хятадын тал Монгол Улсын Гадаад харилцааны яам БНХАУ-ын даргын Монгол Улсад хийсэн төрийн айлчлалын үр дүнг хэрхэн дүгнэж байгаа болон түүнийг хэрэгжүүлэх чиглэлээрх хийж буй ажил, арга хэмжээ, хоёр орны харилцааны талаарх бодол, гурван талт уулзалтын ач холбогдол үр дүн, ач холбогдлыг хэрхэн үзэж байгаа талаар сонирхов.
Монгол, Хятадын улс төрийн намуудын харилцаа, солилцоо нь хоёр орны харилцаа, ард иргэдийн харилцан ойлголцлыг нэмэгдүүлэхэд чухал үүрэг гүйцэтгэдгийг монголын тал онцолж, Тажикстан Улсын Душанбе хотноо болсон Монгол Улс, БНХАУ, ОХУ-ын төрийн тэргүүн нарын гурван талт уулзалтыг зохион байгуулахад хятадын тал дэмжиж ажилласанд талархал илэрхийлэв.
ХКН-ын Гадаад харилцааны хэлтсийн дэд сайд Чэнь Фэнсян Монгол Улсад энэ сарын 24-27-ны өдрүүдэд айлчилж байгаа бөгөөд энэхүү айлчлалынхаа хүрээнд монголын улс төрийн намуудтай уулзалт хийх ажээ.
