Улсын Их Хурлын Тамгын газраас “Бодлого боловсруулах, шийдвэр гаргах үйл  ажиллагаанд судалгааны байгууллагуудын оролцоог нэмэгдүүлэх нь” сэдэвт хэлэлцүүлгийг өнөөдөр  Төрийн ордны "Б" танхимд зохион байгууллаа.      

Энэхүү хэлэлцүүлэгт Улсын Их Хурлын Тамгын газрын Ерөнхий нарийн бичгийн дарга Б.Болдбаатар, Улсын Их Хурлын Тамгын газрын Нарийн бичгийн дарга Н.Отгончимэг, Улсын Их Хурлын Тамгын газрын Судалгаа,  шинжилгээний хэлтсийн дарга Ц.Норовдондог нар болон  Улсын Их Хурлын харьяа судалгааны чиг үүрэгтэй байгууллагын төлөөлөгчид, эрдэмтэн, судлаачид оролцов.

Улсын Их Хурлын Тамгын газрын Ерөнхий нарийн бичгийн дарга Б.Болдбаатар хэлэлцүүлгийг нээж үг хэллээ.

Тэрээр хэлэхдээ “Монгол Улсын хэмжээнд хүчин төгөлдөр мөрдөгдөж буй хууль тогтоомжийн чанарт анхаарч хууль тогтоох үйл ажиллагаанд иргэд, аж ахуй, нэгж, байгууллагуудыг оролцуулж тэр дундаа тухайн салбарын чиглэлээр судалгаа шинжилгээ явуулдаг эрдэмтэд, шинжлэх ухааны байгууллагууд, их, дээд сургуулиуд, төрийн бус байгууллагуудын оролцоог хангах хэрэгтэй байна. Улсын Их Хурлын Тамгын газрын бүтцэд өөрчлөлт хийхдээ судалгааны байгууллагууд, эрдэмтэн мэргэдийг хууль тогтоох үйл ажиллагаанд оролцуулдаг болох талаар анхаарч энэ чиглэл, бодлогыг тусгасан. Улсын Их Хурлаар хэлэлцэж буй болон батлан гаргасан хуулиуд, хуулиудын боловсруулалтын чанар дээр та бүгдийн үнэтэй санал, зөвлөмжүүдийг тусгаж, амьдралд нийцсэн, хүн бүрийн хүсэл сонирхолд таарсан, бүрэн хэрэгждэг, ард олонд хүлээн зөвшөөрөгдсөн ийм хуулийг батлан гаргадаг байх зорилготой юм.” гээд хэлэлцүүлэгт идэвхитэй оролцож,  үнэтэй санал , зөвлөмжөөсөө хуваалцахыг эрдэмтэн, судлаачдаас хүсэв.

Дараа нь Улсын Их Хурлын Тамгын газрын Судалгаа, шинжилгээний хэлтсийн дарга Ц.Норовдондог “Бодлого боловсруулах, шийдвэр гаргах үйл  ажиллагаанд судалгааны байгууллагуудыг татан оролцуулах шаардлага, хамтын ажиллагааг өргөжүүлэх боломж, арга зам”  сэдвээр  илтгэл тавьлаа.

Улсын Их Хурлын Тамгын газрын Судалгаа, шинжилгээний хэлтэс 2009 оноос хойш нийт 500 гаруй  судалгаа, шинжилгээний ажил хийжээ. Нэг жилд 100 гаруй судалгаа, шинжилгээний ажил хийсэн байна. Мөн тэрээр илтгэлдээ судалгааны байгууллагуудын хамтын ажиллагаа сул байгааг онцлоод цаашид байгууллагуудын харилцаа, хамтын ажиллагааг эрчимжүүлэх үүднээс мэдээллээ солилцдог байх боломж бололцоог бий болгох нь зүйтэй хэмээв.Түүнчлэн Төрийн сангуудын статистик дата сантай болох, судалгааны нэгдсэн мэдээллийн сайт ажиллуулдаг болох боломжийг судлах хэрэгтэй талаар онцолсон юм.

Шинжлэх Ухааны Академийн Тэргүүн дэд ерөнхийлөгч, Академич  Д.Рэгдэл, Улсын Их Хурлын Тамгын газраас  хэлэлцүүлэг зохион байгуулж буй явдалд талархаад  анхаарах хамгийн гол зүйл бол  бол энэ чиглэлээр дэлхийн нийтэд тогтсон ямар систем байгааг судалж, түүн дотроос алиныг нь Монгол Улсын хөрсөнд буулгах вэ гэдгийг олж тогтоох явдал гэдгийг  хэлэв. Мөн шийдвэр гаргах түвшинд, бодлого боловсруулах түвшинд оролцох оролцоог хуульчилж өгөх шаардлагатай байна гэлээ.

Харин Удирдлагын Академийн дэд захирал , доктор, профессор Ш.Батсүх, “Улсын Их Хурлын Тамгын газрын Судалгаа, шинжилгээний хэлтсийн дарга Ц.Норовдондог  тулгамдаж буй маш зөв зүйтэй зүйл хэллээ. Судалгааны байгууллагууд харилцан хамтарч ажилладаг  байдал дутмаг учраас мэдээллийн сайттай болж түүн дотроо мэдээллээ тэгш эрхтэй оруулдаг, мэдээлэл авдаг байх нь туйлаас чухал байна. Гэхдээ ерөнхийд нь нэг байгууллага сайтыг зохицуулж удирдах , бусадтайгаа харилцдаг байх хэрэгтэй. Энэ нь судлаачид судалгааныхаа үр дүнг практикт нэвтрүүлэх, бусдад хүргэхэд  ихээхэн ач холбогдолтой зүйл гээд  дэмжиж байгаагаа илэрхийлэв.

Хэлэлцүүлэгт Шинжлэх Ухааны Академи, Удирдлагын Академи, Хуульзүйн Үндэсний хүрээлэн, Монгол Улсын Их сургуулийн Хуульзүйн сургууль, Бизнесийн сургуулийн төлөөлөгчид болон судалгааны чиглэлээр үйл ажиллагаа явуулдаг  Төрийн бус байгууллагуудын төлөөлөл нийт 100 гаруй хүн оролцлоо хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.