Монгол Улсын гурав дахь Ерөнхийлөгч асан Н.Энхбаяр БНСУ-ын харьяат болж буй талаар мэдээлэл өнөөдөр олны анхаарлыг татаж байна. Уг нь намынхаа дараагийн хуралд Н.Энхбаяр даргыг суулгахаар бэлтгэл ажлыг базааж байгаа гэж намынхан нь ярьж байсан. Гэвч дээрх мэдээлэл цацагдсан учир тэд өөр өөрсдийн байр суурийг илэрхийлж байна.

Энэ талаар УИХ-ын гишүүн О.Баасанхүү "Ер нь бол энэ талаар манай намаас албан ёсны мэдээллийг хийнэ. Миний хувьд үүнийг улс төрийн явуулга л гэж харж байна. Үндсэн хуульдаа ч манай улсын иргэн иргэншлээ солих бол эхлээд өөрийн орондоо хүсэлтээ гаргах тухай заасан байгаа. Ийм байтал дээрх мэдээлэл цацагдсан нь, өөрийнх нь хүсэлтээр биш хэн нэгний явуулгаар ийм зүйл болоод байгаа гэх хардлагыг төрүүлж байна. Н.Энхбаяр даргын хувьд хэзээ ч иргэншлээ солих хүн биш. Н.Энхбаяр даргын хувьд БНСУ-д эмчилгээ хийлгэж байгаа" гэсэн юм.