Монгол Улсын  Ерөнхийлөгч асан Н.Энхбаяр БНСУ-ын харьяат болж буй талаар мэдээлэл өнөөдөр олны анхаарлыг татаж байна. Тэгвэл энэ талаар МАХН-аас байр сууриа илэрхийллээ.

Дөнгөж сая МАХН-ын нарийн бичгийн дарга Ц.Шаравдорж, УИХ-ын гишүүн О.Баасанхүү, Шадар сайд Д.Тэрбишдагва хэвлэлийнхэнд мэдээлэл хийлээ.

Энэ үеэр Д.Тэрбишдагва хэлэхдээ “Та бүхэн санаж байгаа бол одоогоос сар гаруйн өмнө Монгол Улсын гуравдахь ерөнхийлөгч, МАХН-ын дарга Н.Энхбаярыг БНСУ-д улс төрийн орогнол хүсэх тухай хүсэлтийг хүргүүлсэн гэх мэдээлэл цацагдаж байсан. Тухайн үед нь манай намын удирдлагууд няцаалт өгч, зарим мэдэгдлийг гаргаж байсан. Тэгвэл өнөөдрөөс хэвлэл мэдээллийн хэрэгслээр дээрх сарын өмнө гарч байсан мэдээллүүд дахин гарч эхэллээ. Хамгийн сонирхол татаж байгаа нь БНСУ-ын хэвлэл мэдээллийн хэрэгслээр улс төрийн орогнол хүссэн өргөдлийг хүлээн авлаа гэх мэдээлэл цацагдаж байна. Үүнтэй холбоотой МАХН-ын удирдлагууд шуурхай хуралдаж, Н.Энхбаяр даргатай өөртэй нь утсаар холбогдсоны эцэст зохих газруудад МАХН-ын байр суурийг илэрхийлсэн албан бичгүүдийг явуулах нь зүйтэй гэж үзсэн. Тухайлбал, БНСУ-д суугаа Монгол Улсын элчин сайдын яаманд дээрх асуудалтай холбогдуулж МАХН-ын зүгээс албан бичгийг хүргүүллээ.  Энэхүү мэдээлэл ор үндэсгүй тухай, өөрийнх нь баттай эх сурвалжаас авалгүйгээр хэвлэл мэдээллийн хэрэгслээр гарсан мэдээллийг засаж залруулах асуудлаар анхаарал хандуулахыг хүссэн. Улмаар уг мэдээллийн цаад эх сурвалжийг тодруулаад бидэнд албан хариу өгөхийг шаардсан.

Сүүлийн үед МАХН-ын үйл ажиллагаа, намын даргыг гутаан доромжлох үүднээс янз бүрийн захиалгат зохион байгуулалттай зүйл явуулж байгаа. Үүний нэг хэлбэр нь МАХН-ын дарга улс төрийн орогнол хүссэн гэх ор үндэслэлгүй мэдээлэл юм. Тэгэхээр энэ Н.Энхбаяр даргыг ийм байдалд оруулахыг хүсдэг, Н.Энхбаяр даргыг Монгол Улсад ирэхээс нь айж болгоомжилдог ийм л улс төрчдийн зохион байгуулж буй үйл ажиллагаа гэдэг нь ойлгомжтой. Харин одоо энэ бүхэн маань хил хязгаар дамнаж явагдаж байна. Өөрөөр хэлбэл, намын даргатай холбогдсон гүтгэлэг улс орон дамнаж гарч байгаан илрэл юм. Ийм учраас МАХН цаашид бүх асуудлыг тавьж олон нийтийн анхаарлын төвд байлгах болно” гэв.

Д.Ундрах /24tsag.mn/