МАХН-ын дарга Н.Энхбаяр БНСУ-ын харьяат болж буй талаарх мэдээлэл багагүй шуугиан дэгдээж байна. Тэгвэл энэ асуудлаар болоод Н.Энхбаяр даргад эрүүгийн хэрэг үүсгэсэн талаар МАХН-ын нарийн бичгийн дарга Ц.Шаравдоржоос зарим зүйлийг тодрууллаа. 

-Н.Энхбаяр даргатай утсаар холбогдож, энэ талаар ярьсан уу?
-Бид МАХН-ын даргатайгаа байнга холбоотой байгаа. Санал бодлоо солилцож, МАХН-ын үйл ажиллагаагаа танилцуулж, Н.Энхбаяр дарга намаа удирдаж байгаа. Өнөөдөр өглөө гэхэд би өөрөө Н.Энхбаяр даргатай холбоо барьсан. Тэрбээр “Энэ асуудал огт байхгүй талаар Монголын ард түмэнд үнэн мөнөөр нь хэлж өгөөрэй. Ийм асуудлыг би хэзээ ч гаргахгүй” гэсэн. Хэд хоногийн өмнө би Н.Энхбаяр даргатай уулзахад “Монголдоо нэг очих юмсан. Улс төрийн гүтгэлэг гэж ямар хэцүү юм. Монголын ард түмэнд ёс зүй, нэгнээ бодох зүйл байхгүй болчихсон гэж үү” хэмээн ярьж байсан. Тэгэхээр энэ мэдээлэл ямар үндэслэлээр Солонгосын хэвлэл мэдээллийн хэрэгслээр гарсаныг зарим эх сурвалжаас сонсоход манай улсаас гарсан нь тодорхой байгаа. Гадаадын хэвлэлд Монголын 9 сарын үед явуулж байсан мэдээллийг үндэслэж гаргасан байсан.
Юутай ч энэ асуудлыг бид олж тогтооно. Ер нь Монголын Улс төр өнөөдөр бохирдсоны нэг шинж. Одоо сүүлд нь улс төрийн өрсөлдөг, намынхаа даргыг Монголд ирүүлэхгүйн төлөө Монголын улс төрөөс явуулахын төлөө, МАХН гэсэн улс төрийн байгууллага байхгүй байлгахын төлөө гадны хэвлэл мэдээллийн байгууллагыг гар хөлөө болгож байна гэдэг Монголын улс төр тун хүнд байдалд орсоны нотолгоо гэж хэлэхээс өөр арга байхгүй.

Цаашдаа бид гүтгэлэг, гүжирдлэгийг зогсоохын төлөө явна. Өрсөлдөөнд цэвэр өрсөлдөж, улс төрийн давцандая. Бие биенийхээ мууг үзэх, тэр тусмаа ийм байдлаар бид улс төрийн давцан дээр хамт явахгүй.

-Тэгэхээр МАХН-ын дарга Н.Энхбаярын хувьд ийм зүйл огт байхгүй гэдэг зүйлийг л ярьж байна уу?
-“Ийм зүйл огт байхгүй. Би Монголдоо очих юмсан. Монголчуудтайгаа уулзаж, Монголынхоо сэрүүн агаарт очиж биеэ тэнхрүүлэх юмсан. Энэ мэдээлэл бол бүгдээрээ гүтгэлэг. Миний нэр төрд халдсан явдал. Иймээс үүнийг Монголын сэтгүүлчдэд хэлээрэй” гэж хэлсэн. Өнөөдрийн Солонгосын сайтуудад бичсэнчлэн улс төрийн орогнол хүссэн, өөр бусад аргаар Солонгос улсад үлдэх гэсэн ямар нэгэн санаа зорилго хүсэл байхгүй гэдгийг хэлсэн.

-МАХН-ын байрны асуудлын талаар?
-Сүүлийн үед би энэ талаар судалж үзсэн. 500 мянган доллараар өөр аж ахуй нэгж худалдах, худалдан авах гэрээгээ хийгээд 2 хоногийн дараа 500 мянган долларыг нь төлж иргэний харилцаа дууссан. Намын байртай холбоотой асуудал эрүүгийн хэргийн шинж байхгүй. Хэрвээ хянагдах ёстой гэвэл иргэний журмаар хянагдах ёстой. Иргэний журмаар хянагдахад яагаад ч энэ бол хэрэг биш гэдэгт би хуульч хүний хувьд итгэлтэй байна. Энэ байдлаар хүнийг гүтгэх, МАХН-ын даргатай улс төрийн тооцоо хийх явдал ийм замаар явж, улс төрийн өрсөлдөгчид ажиллаж байна.