Ерөнхий сайд Н.Алтанхуяг шинэ танхимаа 13 яам, 11 агентлаг, 19 хэрэгжүүлэгч агентлагтай байхаар төлөвлөж, энэ талаарх хуулийн төслийг өргөн барьсан.  Улдмаар Засгийн газрын шинэ бүтцэд шадар сайд Д.Тэрбишдагвыг албан тушаал ахиулж тэргүүн шадар сайд болгох талаар “бор шувуу” ниссэн.  Тэгвэл энэ талаар ямар байр суурьтай байгаа талаар Шадар сайд Д.Тэрбишдагваас зарим зүйлийг тодрууллаа.

-Засгийн газрын шинэ бүтцийн талараа танай намын зүгээс ямар байр суурьтай байна?
-Засгийн газрын шинэ бүтцийн асуудлыг дэмжиж байгаа. Мэдээж дотор нь тодорхой асуудлаар санал зөрөлдөх явдал гарахыг үгүйсгэхгүй. Зарчмын хувьд дэмжиж байгаа.  Бид 16 сайд байна гэдэг асуудлыг зарчмын хувьд хүлээн зөвшөөрч байгаа. Аль яаман дээр хэнийг очуулах, ямар яамыг МАХН, Шударга ёс эвсэл авах вэ гэдгийг ярилцаагүй. Өнөөдөр бүтэц дээр дэмжиж байгаагаа илэрхийлсэн.

-Таныг Тэргүүн шадар сайд болгоно гэсэн. Энэ талаар?
-Шадар сайд гэдэг асуудлыг олонхоороо дэмжсэн. Миний хувьд хоёр шадар сайдтай байх шаардлагагүй гэж үздэг. Өөрөөр хэлбэл, Шадар сайд гэж байхад ахиад цол хэргэм өгч байгаа юм шиг байж байгааг зөв биш гэж хувийнхаа байр суурийг илэрхийлсэн. Харин олонхоороо энэ бүтцийг дэмжихээ мэдэгдсэн. Бүтцийг янз янзаар ярьж, их бага хэмжээгээр өөрчлөлт орохыг үгүйсгэхгүй.

-Гэрээний дагуу сайд нарыг томилох асуудал дээр?
МАХН, Шударга ёс эвсэл хамтарсан засгийн газар дээр гэрээ байгуулж орохдоо гэрээндээ 25 хүний квоттой байна гэдэг заалтаа оруулсан. Өөрөөр хэлбэл, 4 сайдтай байна. Одоо 16 сайдтай байж байхад гэрээний дагуу хүлээсэн үүргээ биелүүлж 4 сайдтай байна гэдгээ хамгаална.