АН-ын ҮЗХ-ний нийт гишүүдийн 80 хувь нь төрийн албан хаагч болж хуулиараа намын харьяаллаас чөлөөлөгдөх ёстой байгаа. Мөн ҮЗХ хоёр жил тутамд гишүүдийнхээ дунд ротаци явуулж 30 хувиа тогтмол шинэчилж явах дүрэмтэй. Гэтэл энэ дүрэм нь хэрэгжихээ болиод удаж байна. Мөн намын эрх барих байгууллага болох намын их хурал нь ч хуралдалгүй 6 жил болжээ. Үүнд ардчиллын анхдагчид тун их бухимдалтай яваа. Тухайлбал Д.Сосорбарам “зургаан жил хурлаа хийдэггүй, улстөрийн нам гэж байдаг юм уу?” гэж нэлээд бухимдангуй байр сууриа илэрхийлсэн.

Тэгвэл АН-ын их хурлыг шаардаад байгаа МоАХ-ныхон өөрсдийнхөө дүрэм журмыг хөсөр хаяад удаж байгаа талаар тус холбооны анхдагчид дуу хоолойгоо илэрхийлж эхлэв. Тус холбоог үүсгэн байгуулагч анхдагчдын нэг Ж.Равдандорж энэ талаар хэвлэлд өгсөн ярилцлагадаа тодорхой дурьдсан байна.

Тэрээр “ МоАХ-ны бодлого алдагджээ. 3-р Их хурал гэж шоу хийсэн. Церемони маягийн сүртэй ёслолын ажиллагаатай хурал болсон. Яг ажил хэрэг ч хурал хийгдээгүй. МоАХ-ны дарга хууль ёсны дарга мөн үү асуудал ингэж тавигдана. МоАХ-ны дүрмэнд “МоАХ-ны даргыг 4 жилийн хугацаатай сонгодог. Нэг удаа улиран сонгогдож болно.“ заасан байдаг. Мөн дүрмээрээ МоАХ-ны чуулганыг 3 жилд нэг удаа зарлан хуралдуулах ёстой” гээд МоАХ-ны даргын сонгууль 2006 оноос хойш 8 жилийн хугацаанд нэг ч удаа явагдаагүй гэдгийг онцолжээ.

Түүний хэлснээр бол Ардчиллын анхдагчид маань өөрсдөө нэг хүний гарт орж ардчиллаа умартаад байгаа нь тодорхой боллоо. Тиймдээ ч МоАХ-ны партизанууд нэгдэж их хурлаа хуралдуулахаар албан ёсны фракц байгуулж эхэлсэн байна. Ийнхүү Х.Баттулга МоАХ-ны дотроосоо эсэргүүцэлтэй тулгарж эхэлсэн нь түүнийг сайд болох нь бүү хэл МоАХ-ны даргын суудлаа алдаж ч болзошгүй байдалд орсон гэдгийг эх сурвалж мэдээллэж байна. Өнгөрсөн хугацаанд Х.Баттулга МоАХ-ны хүчээр хоёр ч удаа сайд болсон. Мөн МоАХ-ныг бүрэн санхүүжүүлж байсан гэдгээрээ бүх бодлогоо шулуун дардан замаар хэрэгжүүлж ирсэн билээ. Харин МоАХ фракцыг байгуулагчдын үзэж байгаагаар Х.Баттулга МоАХ-ныг хагалан тарамдуулж хүчгүй болгож байгаа хүн ажээ. Энэ тухайд “Яг үнэнийг хэлэхэд Х.Баттулга дарга МоАХ-ны нэрээр Монгол Улсын төрийн сайдыг хоёр удаа хашлаа. Тэгээд сайдын суудлыг хаяад явж болохгүй. Яагаад гэвэл ЗГ-т орно гэдэг чинь тэнд бодлого явж байна. ЗГ-ын гишүүн болно гэдэг том бодлого, хариуцлага. Хөлөг онгоцны ахмад хөлөг онгоцоо хаяад явж болохгүй биздээ. Арынх нь хүмүүс бүгд үхнэ биз дээ. Ялгаа байхгүй хариуцлагаас мултарч байгаа биздээ. Тэгээд Үйлдвэр хөдөө аж ахуйн яам, Гадаад харилцааны яам, Соёл, спорт, аялал жуулчлалын яам, Төрийн өмчийн хороо, Зам тээврийн яам энэ бүх бодлого хаашаа явах вэ? Хаашаа явсан нь бүү мэд” гэж мэдэгджээ.

Цаашлаад түүний дүрмийн бус дарга, хурлаа хийж олонхиороо асуудлыг шийддэггүй, их хурлаа хуралдуулах шаардлага тавьсан албан тушаалтнуудаа ээлж дарааллан албан тушаалаас нь халсан гэх мэтээр маш урт шүүмжлэл дагах боллоо.

Эх сурвалжийн мэдээллэж байгаагаар Х.Баттулгын эсрэг МоАХ-ны хөдөлгөөн нэлээд газар авч, анхдагчид нь нэгдээд байгаа гэнэ. Тэд МоАХ-ыг хувийн компани шигээ байлгадаг санхүүжилтээрээ далайлгаж дураараа авирладаг Х.Баттулгыг зогсоохоор нэлээд эрчимтэй хөдөлж эхэлсэн бөгөөд дараагийн МоАХ-ны дарга болох боломжтой хүмүүсийг ч ярилцаж эхэлсэн байна.

Хэдэн өдрийн өмнө Х.Баттулга АН-ын бүлгийн хурал дээрээ “бүтцийн өөрчлөлтөөр би сайд больё” гэсэн саналаа хэлсэн гэсэн мэдээлэл тараад байсан. Харин баттай эх сурвалжийн мэдээллээр бол Х.Баттулга ийм санал гаргаагүй бөгөөд, түүний хүссэн ч сайд болгохгүй байх хатуу тохироог дээрээ хийж чадсан гэнэ. Н.Алтанхуяг өөрийнх нь бодлогыг хамгийн их хөндөлсөж сэлэм эргүүлсэн тэднийг фракцынхныг ээлж дарааллан засгаас шахаж гаргах бодлогоо шийдэмгий хэрэгжүүлж байгаа. Энэ удаагийн бүтцийн өөрчлөлтөөр засагт үлдсэн түүний сүүлчийн хүн А.Гансүхийг үдэн мордуулах нь ч тодорхой болоод байгаа билээ. Ийнхүү Х.Баттулга сайд бүү хэл МоАХ-ны дарга дээрээ тогтож үлдэх үү? Гэсэн асуудал үүсч АН-ын дотоод улстөрийг нэлээд сонирхолтой болгож эхлээд байна.