Ерөнхий сайд Н.Алтанхуяг Засгийн газарт өөрчлөлт оруулж бүтцийн шинэчлэл хийнэ гэдгээ мэдэгдсэн.

Тодруулбал,

•     Сангийн яам, Эдийн засгийн хөгжлийн яамыг нэгтгэн Сангийн яам,
•     Уул уурхайн яам, Эрчим хүчний яамыг нэгтгэн Геологи, уул уурхай, эрчим хүчний яам,
•   Барилга хот байгуулалтын яам, Зам тээврийн яамыг нэгтгэн Дэд бүтцийн хөгжлийн яам болгон өөрчилж нийт 13 яам, 11 агентлаг, 19 хэрэгжүүлэгч агентлагтай болгоно гэсэн билээ.

Тэгвэл ЗГ-ын бүтцэд өөрчлөлт оруулахдаа "МАХН-МҮАН-ын “Шударга ёс” эвслийн бүлгээс сонгогдсон дөрвөн сайдыг хэвээр үлдээх ёстой" гэж тус бүлгээс мэдэгдээд байна. Учир нь Засгийн газрыг бүрдүүлж байгаа намуудын гэрээнд "Засгийн газрын бүтцийг шинэчилсэн ч "Шударга ёс" эвслийн бүлгийн сайд нарыг өөрчлөхгүй" гэж тохиролцсон байдаг аж. Тиймээс гэрээг зөрчилгүйгээр бүтцийн өөрчлөлт хийх ёстой гэж үзэж байгаа аж. Тэгвэл  Ерөнхий сайд Н.Алтанхуяг “Шударга ёс” эвслийн дөрвөн сайдыг гурав болгож цөөлөх төлөвлөгөөтэй байгаа гэнэ. Харин тус бүлэг гэрээнд заасны дагуу нэг ч сайдаа Засгийн газраас гаргах төлөвлөгөөгүй байгаа бөгөөд хэрвээ гурав болгож цөөлбөл Засгийн газраас гарна гэдгээ мэдэгдэх аж. “Шударга ёс” эвслийн бүлэг хуралдаж энэ талаараа ярилцаад ямар нэгэн шийдэлд хүрээгүй талаар эх сурвалж мэдээллээ. Ямартай ч тус бүлэг Засгийн газарт дөрвөн сайдаа үлдээнэ гэж зүтгэх юм байна.

МАХН-ын Ерөнхий нарийн бичгийн дарга Г.Шийлэгдамба өмнө нь энэ талаар байр сууриа илэрхийлэхдээ “Засагт өөрчлөлт орсон ч “Шударга ёс” эвслээс сонгогдсон сайд нарыг өөрчлөх ёсгүй" гэсэн билээ.