Яг одоо чуулганаар Засгийн газрын бүтцийг өөрчлөх хуулийн төслийн хэлэлцүүлгийг хийж байна.

Тодруулбал, Сангийн яам, Эдийн засгийн хөгжлийн яамыг нэгтгэн Сангийн яам, Уул уурхайн яам, Эрчим хүчний яамыг нэгтгэн Геологи, уул уурхай, эрчим хүчний яам, Барилга хот байгуулалтын яам, Зам тээврийн яамыг нэгтгэн Дэд бүтцийн хөгжлийн яам болгон өөрчлөх, Засгийн газрын бүтцэд Монгол Улсын Тэргүүн шадар сайд ба Монгол Улсын Шадар сайд гэсэн албан тушаал бий болгохын зэрэгцээ Ерөнхий сайдын дэргэд Эдийн засгийн хөгжлийн хороог ажлын аппаратын хамт бий болгохоор тусгасан бөгөөд өнөөдрийн Төрийн байгуулалтын байнгын хорооны хуралдаанаар Үйлдвэр хөдөө аж ахуйн сайдын эрхлэх асуудлын хүрээнд байгаа хүнд үйлдвэрлэлийн салбарын асуудлыг Уул уурхай, Эрчим хүчний яаманд хариуцуулах гэсэн санал,  Соёл, спорт аялал жуулчлалын яамыг татан буулгаж, эрхлэх асуудлыг нь Эрүүл мэнд, Боловсрол, Байгаль орчны яаманд шилжүүлэх санал гаргасан нь тус, тус дэмжлэг хүлээсэн бол Засгийн газрын бүтцэд Монгол Улсын Тэргүүн шадар сайд ба Монгол Улсын Шадар сайд гэсэн албан тушаалтай болгох санал дэмжлэг хүлээгээгүй юм.

Уг асуудлын хүрээнд ССАЖ-ын яамыг татан буулгах асуудлыг хэлэлцээд гишүүдийн олонхийн саналаар дэмжсэнгүй. Энэ асуудлаар гишүүд саналаа хэлсэн юм. Тодруулбал, Р.Гончигдорж “ССАЖ-ын яам гэсэн бүтцийг хасч болохгүй. Ашиг сонирхлын маргаан байгааг мэдэж байна” хэмээсэн юм.  Л.Болд “Энэ бүтцээс спортыг салгаж өөр яаманд шилжүүлэх нь зөв. Харин соёл, аялал жуулчлалыг хамтад нь хөгжүүлэх ёстой” гэлээ.  ССАЖ-ын яамны чиг үүргийг өөр яамдад хуваахыг Ж.Энхбаяр гишүүн дэмжиж буйгаа илэрхийлэн “Татан буулгах гээд байгаа юм биш, ажлыг нь сайжруулах бүтцэд шилжүүлэх гээд байгаа хэрэг. Урлагийн байгууллагын мэргэжлийн чадавхи алдагдсан, Динозаврын байшин яриад гурван жил өнгөрлөө. Энэ хооронд хэчнээн өв соёл үгүй болов. Динозаврын яс бол өв биш, архелогийн олдвор шүү. Соёлын, спортын, аялал жуулчлалын салбаруудад бүгдэд уналт гарлаа шүү дээ. Энэ хооронд сайн банхар нохойн идүүр хадгалагдаж үлсдэнгүй ” гэсэн юм.

Одоо чуулганаар  байнгын хорооноос гаргасан зарчмын зөрүүтэй саналаар санал хурааж байна.