Сүүлийн нэг жил улс төрийн хэрүүл огтхон ч тасарсангүй. Огцруулах, давхар дээл, Засгийн газрын бүтэц гээд энэ улсад тайван амьдрах боломж ч алга. Удахгүй ирэх оны улсын төсвийг хэлэлцэж нутаг нуга, нам бүлэглэлээрээ баахан талцана. Одоо ч төсвийн хэрүүл эхлэв. Эх сурвалжийн мэдээлж байгаагаар бол 2015 оны улсын төсвийн төслийг УИХ-ын гишүүдэд тарааж өгчээ. Үзсэн гишүүн бүр толгой сэгсэрч, "эргэж чулуудмаар юм оруулж ирсэн" хэмээн ам хэлээ билүүдэж байгаа гэнэ. Тухайлбал АН дотроо л асуудалд эрүүл саруулаар ханддаг гэх УИХ-ын гишүүн М.Зоригт 2015 оны төсвийг толгой сэгсрэн муулж байна. Тэрээр "Өнгөрсөн мягмар гаригт Засгийн газраас оруулж ирсэн төсвийг сайд нарынх нь ярьж байгаагаас сонсоход 2015-2016 онд бид ажил хийхгүй юм байна. Нэгэнт мөнгө байхгүй учраас хөнжлөө нөмрөөд хэвтэж байя, хэмнэе, бүтцээ цомхотгоё, ирэх хоёр жилд ажилгүй жаргая гэсэн төсөв орж ирж байна. Шинээр орж ирэх хөрөнгө оруулалт бараг байхгүй гэнэ. Урсгал зардлаа танаж байгаа сурагтай. Хэмнэлт хийх нь хамгийн сайн гарц гэж хүмүүс ойлгодог бололтой. Хэмнэж байна гэдэг тэр хэрээрээ ажил хийхгүй л гэсэн үг ш дээ" хэмээн тайлбарлаж байна. Өөрөөр хэлбэл эдийн засгийн хямрал, гаднаас авсан их өр зээлээсээ болоод ирэх жил бүтээн байгуулалтын ямар нэгэн ажил хийхгүй болжээ. Мөнгө байхгүй гэж элгээ тэврээд хэвтэцгээх бололтой. Ийм урагшгүй байдал УИХ-ын төдийгүй ард түмний уур бухимдлыг ч нилээд өрдөхөөр байна. Тиймээс л М.Зоригт гишүүн "Засгийн газрын оруулж ирж байгаа төсвийг энэ хэвээр нь баталвал би л хувьдаа үлдсэн жилүүдэд УИХ-ын гишүүн байхыг хүсэхгүй. Ирэх жилүүдэд энэ төрөөс ард түмэнд очиж буй ач тус гэж юу байх вэ. Ач тусаа үзүүлэхгүй, ажил хийхгүй газар бид юугаа хийж суух вэ гэдэг бодолтой байна" хэмээн өөрийн байр сууриа илэрхийллээ. Ийм байр сууринаас хандаж байгаа М.Зоригт шиг олон гишүүн бий гэж саарал ордны эх сурвалж мэдээллээ.


    Нэгэнт бүтээн байгуулалтын ажил хийхгүй зөвхөн урсгал зардал, халамж хоёрт л бүх мөнгөө төлөвлөх бол энэ улсын унаж байгаа эдийн засаг эрчээ авна. Бүх бүтээн байгуулалт нам зогсоно л доо. Өнгөрсөн хавар Ж.Энхбаяр УИХ-ыг тарах хэрэгтэй гэсэн санаачилга өрнүүлж байсан. Түүний санаачилгыг М.Зоригт гишүүн үргэлжлүүлэх бололтой. Тэрээр "Болж өгвөл төсвөө баталж чадалгүй УИХ тарчихвал бүр сайн. Болохгүй байгаа учраас цаг алдалгүй дахиад нэг сонголт хийж яагаад болохгүй гэж" хэмээн халаглаж байна. Эртнээс УИХ-ыг тарсан ч яахав гэсэн байр сууринаас хандах болсон МАН-ынхан тохироо бүрдвэл асуудлыг шуурхайлан дэмжих магадлал өндөр. Тэгэхээр 2015 оны төсөв хэрүүлийн алим болохоос гадна УИХ-ыг тараая гэсэн түрлэгт хүч нэмэх ид шидийг агуулжээ.


    2015 оноос эхлээд ойрын 10 жилдээ Монголд том бүтээн байгуулалт хийгдэхгүй гэж МАН-ынхан үзэж байгаа. Учир нь төсвөөс "Чингис", "Самурай" бондынхоо өрийг төлсөөр байтал бүтээн байгуулалт хийх мөнгө үлдэхгүй. Харин багш, эмч нарынхаа цалинг тавьж байвал их юм гэж муу ёрлосон нь үнэн болох талруугаа явчихлаа. Тийм учраас УИХ-д олонхийг бүрдүүлж байгаа М.Зоригт гишүүн "Ирэх жилээс бондын мөнгийг төлж эхэлнэ. Эргүүлэн төлөх улсын төсвийн эх үүсвэр үнэндээ харагдахгүй байгаа юм. УИХ-д суудалтай намуудын удирдлага санаачилгагүй байна. Нэмж хэлэхэд лидерүүд, манлайлагчид ажлаа хийхгүй байна. Манлайлал гэж байхаа больчихож. Аль ч намын дарга нь хаана байгаа нь мэдэгдэхгүй арчаагүй л байна" хэмээн бухимдлаа илэрхийлэх болов. Эдийн засаг хүндэрч, ард түмний амьдрал ядруудаад байхаад "Тайван сайхан, инээсэн, маадгар царай ордноос өөр газар байхгүй. Би ч ууртай байгаа. Өнгөрсөн зуны их амралтаар ордны гаднах хүмүүсийн санаа бодлыг тээж орж ирснээ хуулийн төсөл бүх зүйл дээр илэрхийлнэ" хэмээн асуудалд хандах хандлагаа тодорхойлж байна. Тиймээс өчигдөр Засгийн газрын бүтцийн асуудлыг хэлэлцэхэд намынхаа байр суурийг шүүмжлэн "Миний санал УИХ дахь олонхийн санал хоёр зөрдөг боллоо" хэмээн учирласан. Олонхийн гишүүд ингэж олонхийнхоо саналыг зөрдөг байдал өдөр ирэх бүр л нэмэгдэж боллоо.