Эдийн засаг хүндэрснийг Засгийн газар хүлээн зөвшөөрч эхэллээ. Учир нь 2015 оноос эхлэн багш, эмч нарынхаа цалинг Монгол Улс тавьж чадахгүй хэмжээнд хүрч байна. Тиймээс нийслэл Улаанбаатар хот дахь сургууль, цэцэрлэгийн багш нар, эрүүл мэнд, соёл урлагийн ажилчдын цалин, урсгал зардлыг нийслэл өөрөө олж тавь гэсэн чиглэлийг Засгийн газраас өгсөн нь жинхэнэ дуулиан боллоо. Чиглэл ч гэж дээ эдгээр цалин, урсгал зардлыг нийслэл хариуцна гэсэн хуулийн төслийг Сангийн яам, Шинэчлэлийн Засгийн газар боловсруулж УИХ-л өргөн барьчихсан юм.

    Засгийн газрын энэ шийдвэрийг сонсоод Нийслэлийн Засаг дарга Э.Бат-Үүл цамнаж өгч байна. Тэрээр "Ерөнхий сайдаас 2015 оны төсвийг өргөн мэдүүлсэн. Энэ төсвийн төсөл дээр багш нарын цалин, сургуулийн ашиглалтын зардал,  эрүүл мэндийн анхан шатны салбарт ажиллагсадын цалин, ашиглалтын зардал, соёлын үйлчилгээ эрхэлж байгаа байгууллагуудын ажиллагсадын цалин, ашиглалтын зардал зэрэг нийтдээ 330 гаруй тэрбум төгрөгийн зардлыг нийслэлд хариуцуулахаар өгсөн. Энэ бол нийслэлийг дампууруулна. Нийслэлийн эдийн засгийг маш хүнд байдалд оруулсан шийдвэр. Хэрэв энэ төсөв УИХ-аар батлагдах юм бол нийслэл багш нарын цалинг тавьж чадахгүй. Эмч нарын цалинг тавьж чадахгүй. Соёлын үйлчилгээ эрхлэгчдийн цалинг тавьж чадахгүй. Ер нь яагаад Засгийн газарт урсгал зардал, цалингийн фондыг хариуцуулдаг вэ гэхээр Засгийн газар онцгой татвар, нэмэгдсэн өртгийн татвар, гаалийн татвар гэх мэт өдөр тутам орж ирдэг урсгал дансны орлоготой байхгүй юу. Манай нийслэл болохоор цалин тавьсаны дараа хүн амын орлогын албан татвар авдаг. Мөн үл хөдлөх хөрөнгө гэх мэт улиралд, жилд нэг удаа авдаг татваруудтай. Өөрөөр хэлбэл нийслэлд урсгал орлого байхгүй. Бидэнд цалин тавих урсгал орлого орж ирдэггүй. Нөгөө талаас нь авч үзвэл эдийн засаг хүндэрсэн энэ үед Засгийн газар та нар татвараа нэм гэдэг асуудлыг тавьж байна. Энэ байдлаа Ерөнхий сайдад өчнөөн учрыг хэлсэн. Хэрэв биднийг энэ хүмүүсийн цалинг өг гэж байгаа бол нийслэл гаалийн,  нэмэгдсэн өртгийн гэх мэт урсгал орлогоо авах ёстой. Урсгал орлогогүй бид яаж цалин тавьж чадах вэ? Энэ хуулийн төслийг Сангийн яам, Ч.Улаан сайд санаатай хийлээ гэж би ойлгож байгаа. Нийгмийг хямрал руу түлхэх гэсэн улс төрийн зорилго агуулсан юм уу? яасан юм бэ? Би л лав ийм хариуцлагыг хүлээхгүй. Нийслэлийн иргэдийг хохироосон ийм шийдвэрийг би л хувьдаа зөвшөөрөхгүй. Эсэргүүцнэ. УИХ-ын даргатай уулзсан. Хэлсэн. Захидал явуулж байна. Аргаа барж байна" хэмээн бухимдлаа илэрхийллээ.

    Эндээс дүгнэж үзвэл Монгол улс мөнгөгүй болчихоод 2015 онд багш, эмч гэх мэт төсвийн байгууллагад ажиллагсадынхаа цалинг хаанаас олж өгөх вэ гэдэг дээр хэрүүлийн алим тарьж байна. Улсын төсөвт суулгах боломж хомс учир нийслэлийг Улаанбаатарт байгаа багш, эмч нарынхаа цалинг ядаж хариуц гэж шууд тулган хүлээлгэж байна. Харин хотын дарга энэ боломжгүй асуудлаас гадна нийслэлийн иргэдийг тогтворгүй байдалд хүргэх санаачилга гэж тодорхойлоод зогсохгүй тэмцэхээ илэрхийлэв.

    Ер нь 2015 оны төсөв ихээхэн хэрүүл тарихаар байна. Өмнө УИХ-ын гишүүн М.Зоригт "Хэрэв Засгийн газрын оруулж ирсэн 2015 оны төсвийг хэвээр нь баталвал УИХ-ын гишүүнээсээ татгалзана" гэж зоригтой мэдэгдсэн юм. Энэ удаа Нийслэлийн засаг дарга төсвөөс болж тэмцэл өрнүүлэхээ зарлав. Энэ байдлаараа бол манай улс ирэх жил багш, эмч нарынхаа цалинг нэмэх нь байтугай хугацаанд нь тавьж чадахгүй бодит байдалтай нүүр тулахаар болсныг дээрх үйл явдлууд гэрчиллээ.