Шинэчлэлийн Засгийн газар хоёр жил ажиллаад бүтцээ өөрчлөв. Ингэж замын дундаа өөрсдөө сайн дураараа бүтцээ өөрчилсөн нь Монголын парламентын нэн шинэ түүхэнд болж байгаагүй үзэгдэл гэж сөрөг хүчин дүгнэсэн юм. Харин шинэчлэлийн засгийн газар шинэчлэгдэхээр ямар нэртэйгээр цааш ажиллах вэ гэсэн асуудал саарал ордонд яригдаж байна. Зарим эх сурвалжийн мэдээлж байгаагаар бол "Шинэчлэгдсэн шинэчлэлийн Засгийн газар" гэж нэрлэх бололтой. Ийм нэршлийн хувилбар дээр тогтож байгаа гэнэ.

    Үүнээс гадна өөр нэг асуудал ихээхэн анхаарал татаж байгаа нь Шинэчлэлийн Засгийн газар үлдэж байгаа хоёр жилдээ 13 яамтай ажиллах болсон явдал юм.

1. Батлан хамгаалах
2. Байгаль орчин, ногоон хөгжил
3. Боловсрол шинжлэх ухаан
4. Гадаад харилцаа, эдийн засгийн хамтын ажиллагаа
5. Зам тээвэр, барилга хот байгуулалт
6. Сангийн яам
7. Соёл спорт, аялал жуулчлал
8. Уул уурхай, эрчим хүч
9. Үйлдвэр, хөдөө аж ахуй
10. Хууль зүй
11. Хөдөлмөрийн яам
12. Хүн амын хөгжил, нийгмийн хамгаалалын яам
13. Эрүүл мэндийн яам гэж баталлаа.

    Энэхүү 13 гэсэн тоо муу ёрыг зөгнөдөг л дөө. Ялангуяа Европод ихээхэн цээрлэдэг. Учир нь энэ тоо муу зүйлийг иэлэрхийлэхээс гадна аливаа зүйлийн хугацааг богиносгодог гэдгээс зайлсхийдэг аж. Гэтэл Монголын шинэчлэгдсэн шинэчлэлийн Засгийн газар 13 яамтай ажиллах болсон нь ихээхэн анхаарал татаж шүүмжлэлийн нэг хэсэг болов.

    Харин Засгийн газрын эх сурвалжууд үүнийг ихээхэн билэгшээж байгаа гэнэ. Тэдний тайлбараар бол 13 гэсэн тоо нь 13-р зууныг билэгдэж байгаа аж. 13 зуунд Монголчууд хүчирхэг болж, ялж, мандаж дэлхийг байлдан дагуулсан түүхтэй. Өөрөөр хэлбэл хүчирхэг мандан бадрахыг билэгдэж 13 гэсэн тоог ашиглаж яамаа бүрдүүлсэн болж таарч байна. Хэрэв энэ үнэн бол Засгийн газрынхан бүтцээ хийхдээ хүртэл билэгдэлийг ихээхэн эрхэмлэсэн бололтой.

    Эндээс дүгнэж үзвэл 13 гэсэн тоо нь богино, түргэн гэсэн санааг илэрхийлдэг ч Монголчуудын хувьд ялж мандаж, хүчирхэгжиж байсных нь илрэл болж байна. Тиймээс  Шинэчлэгдсэн Засгийн газар зарим хүмүүсийн ёрлоод байгаа шиг богинохон настай байх уу? Эсвэл өөрсдийнх нь ерөөж байгаа шиг сэргэн мандсан хүчирхэг, ялан дийлэхийн илэрхийлэл болох уу гэдгийг ирэх өдөрүүд харуулах л үлдлээ. Ямар ч байсан ийм яриа, зүйрлэл саарал ордонд хүчээ авч байна.