Өчигдөр орой 10.30 минутад Сөүлээс МАХН-ын дарга Н.Энхбаяр Монголдоо ирэв. Жил гаран нутагтаа ирээгүй түүнийг тосох гэж МАХН-ын бүхий л удирдлага гишүүд ирсэн байв. Нисэх буудлын үүд МАХН-ын гишүүд Н.Энхбаярын фэнүүдээр дүүрсэн байлаа. Яарсан, сандарсан хүмүүс. Зарим нь нулимс дуслуулна. Сүү, хадаг барьсан хүмүүс ч тааралдав. Хэвлэл мэдээллийнхэн багагүй цуглав. МАХН-ынхан "дарга ирлээ" гэж байнга бусад руугаа мэдээлэл тасралтгүй өгнө. Энэ бол Н.Энхбаярыг угтан авах үеийн үйл явц. Түүнийг Шадар сайд Д.Тэрбишдагва, Сангийн сайд Ч.Улаан, УИХ-ын гишүүн Н.Батцэрэг, Ц.Оюунбаатар, Ц.Цолмон, О.Баасанхүү, З.Баянсэлэнгэ, МАХН-ын Ерөнхий нарийн бичгийн дарга Г.Шийлэгдамба, Эрүүл мэндийн сайд Н.Удвал, дэд сайд Б.Цогтгэрэл, хүү Э.Батшугар гээд бүхий л эрхэмүүд ирсэн байв. Эхнэр О.Цолмон нь цуг ирсэн үү? эсвэл тоссоно уу хамт байв. 2013 оны наймдугаар сарын нэгэнд Монгол Улсын Ерөнхийлөгч Ц.Элбэгдорж зарлиг гарган Н.Энхбаярт өршөөл үзүүлж байсан. Үүнээс хэдхэн хоногийн дараа Н.Энхбаяр БНСУ-ыг зорьж эмчлүүлэхээр явсан юм. Түүнээс хойш эх орондоо ирэлгүй жил гаран болсон МАХН-ын дарга Н.Энхбаяр Чингис хаан нисэх онгоцны буудал дээр сэтгүүлчдэд товчхон мэдээлэл өгсөн. Тэрээр "Эх орондоо ирлээ. Эх орон гэдэг бол уул ус ургамал навч, ганцхан цэцэг ч байж болно. Хамгийн гол нь хүн ард маань юм. Эх орны минь агаар ус сайхан байна. Монгол нутгаа, Монголын ард түмнээ л их саналаа. Би эмчлүүлж байгаа. Эмнэлэгээсээ чөлөө аваад ирлээ. Эмнэлэгтэйгээ ярьж байгаад буцаад явна. Засгийн газрын бүтцийн асуудлаар намынхантай ярилцана. Намайг БНСУ-ын иргэн болох гэж байгаа гэсэн мэдээлэл их түглээ. Яаж тийм юм байхав дээ. Тэгээд Солонгосын бичсэн хэвлэлийнхэнтэй холбогдсон. Монголоос тийм мэдээлэл авсан гэж хариулж байна лээ. Манай Монголчууд л тийм буруу мэдээлэл өгсөн юм билээ. Эрүүгийн хэргийн хувьд хийсэн буруу юм байхгүй. Тиймээс хэрэгсэхгүй болох байхаа гэж бодож байна" хэмээн тайлбарласан юм.
1. Түүнийг аав, ээж хоёр нь эх нутагтаа ирэхийг хүссэн байна. Тэгээд ч аав, ээж хоёрынх нь бие сайнгүй байгаа гэнэ.
2. Засгийн газрын бүтцийн асуудлаар намынхантай бас хамтрагч, эрх баригч АН-ынхантай ойлголцохоор ирсэн аж. Шинээр байгуулагдаж байгаа Засгийн газарт "Шударга-ёс" эвсэлд гурван сайдын суудал оногдоод байгаа. Өмнө дөрөв байсан юм. Н.Энхбаяр үүнийг дөрөв хэвээр нь байлгана гэж намынхандаа амлажээ. Тэр амласанаа биелүүлэхийн тулд Ерөнхий сайд Н.Алтанхуягтай уулзалт хийх нь тодорхой болж байна. Бас Н.Энхбаярын үзэмжээр дараагийн сайд нарын нэрс тодроно. Хоорондоо хэрүүлтэй байгаа МАХН-ынхан даргыгаа ирэх хугацаанд эв зүйгээ нэг олох биз.
3. Өөрт нь үүсгэсэн эрүүгийн хэргийн учрыг олох аж. Тэрээр өөрт нь үүсгэсэн эрүүгийн хоёр хэргийн талаар тайлбар өгч, хууль хүчний байгууллагынхантай ч уулзахаар иржээ.
Ийм гурван хэргийг бүтээгээд тэрээр тун удахгүй "нүүдлийн шувуу" шиг БНСУ-ыг зорих төлөвлөгөөтэй байгаа аж. Түүний эх орондоо ирээд хэлсэн хамгийн супер үг бол "Монголын ард түмнээ их саналаа" гэдэг байлаа.
Сэтгэгдэл (49)