Өчигдөр орой 10.30 минутад Сөүлээс МАХН-ын дарга Н.Энхбаяр Монголдоо ирэв. Жил гаран нутагтаа ирээгүй түүнийг тосох гэж МАХН-ын бүхий л удирдлага гишүүд ирсэн юм. Мэдээж намынхаа нөхөд, хурсан олныг харсан МАХН-ын дарга Н.Энхбаяр сэтгэл нь догдолж, маш баяртай байгаагаа илэрхийлж байв. Харин тэрбээр хурсан олон дундаас нэгэн хүнийг онцлон тэвэрч, үнсэн угтав.
Энэ бол Хууль зүйн дэд сайд асан Э.Эрдэнэжамъян. Тэрбээр Э.Эрдэнэжамъянг тэврээд хоёр ч удаа үнсэж харагдав. Түүний хувьд өөрийнх нь дүүгийн төлөө Интерполд захиа бичсэнээс болоод албан тушаалаасаа огцорсон гэгдэх Э.Эрдэнэжамъянтай гэмшсэн байдалтайгаар уулзаж, баярласандаа ийм үйлдэл гаргав уу?. Эсвэл Э.Эрдэнэжамъян түүний хувьд маш сайн журмын нөхөр нь учир нь ингэж сэтгэл догдлон уулзав уу мэдэхгүй юм. Юутай ч тэрбээр энд байх хугацаандаа Э.Эрдэнэжамъянг албан тушаалд томилох асуудлыг хөөцөлдөх төлөвлөгөөтэй  байсан ч байж болох юм. Гэвч шүүхээс Э.Эрдэнэжамъянг хоёр жил улс төрийн алба хашиж болохгүй гэх шийдвэрийг гаргасан учир намынх нь дарга хоёр жилийн дараа гэх амлалтыг тавиад л буцах биз ээ.