МАХН-ын дарга Н.Энхбаяр жил гарны дараа эх орондоо ирсэн нь олон түмний анхаарлыг ихээхэн татаж байна. Түүнийг аав ээжтэйгээ уулзах, хамтарч байгаа эрх баригчидтайгаа ойлголцох, эрүүгийн хэрэгүүдийнхээ учрыг олох гэж мэдээлсэн юм. Тэрээр ажиглагчдын төсөөлж байснаас ч хурдан улс төрийн асуудлаа шийдвэрлэж байна. Ирсэнийхээ маргааш өглөө бүлгийнхээ хуралд сууж, орой нь Засгийн газрын тэргүүн Н.Алтанхуягтай уулзав. Хагас бүтэн сайнд ч амарсангүй. Уулзалтуудаа хийв. Ерөнхий сайд Н.Алтанхуяг, Н.Энхбаяр хоёрын уулзалт нилээд удааширсан гэж эх сурвалж мэдээлэв. Тэд хуримтлагдсан олон асуудал дээр тохирч тодорхой байр суурьтай болцгоож бас тохиролцжээ.

Нэгдүгээрт: Засгийг хамтран байгуулсан талууд өнгөрсөн хугацааны ажил, үйл ажиллагаандаа сэтгэл хангалуун байгаа гэдэг дээр санал нэгдэж.

Хоёрт: О.Баасанхүү гэх мэт эвслийн гишүүдийн үйл ажиллагаанд сэтгэл хангалуун бус байгаагаа Н.Алтанхуяг сануулжээ. Учир нь О.Баасанхүү Засгийн газрын гишүүн Х.Тэмүүжинг огцруулах бичиг өргөн барьж ихээхэн сандаргасан юм. Өөрөөр хэлбэл хамтарч засаг байгуулчихаад бие биенийхээ эсрэг ажилласан нь ёс зүйгүй үйлдэл гэжээ. Тиймээс аль аль нь иймэрхүү үйлдэлүүд цаашид гаргах ёсгүй гэсэн байна.

Гуравт: Одоогийн Засгийн газар байгуулагдахдаа 25 хувийг нь Н.Энхбаярын тэргүүлдэг “Шударга ёс” эвсэлийнхэн бүрдүүлэхээр гэрээ байгуулсан. Уг гэрээний дагуу Д.Тэрбишдагва, Н.Удвал, М.Сономпил, Ч.Улаан гэсэн дөрвөн сайдыг эвсэлээс томилсон. Харин шинээр байгуулагдаж байгаа Засгийн газарт Н.Алтанхуяг гурван сайдаа эвсэлд өгнө. Нэгийг нь хасна гэсэн мэдээлэл эрчимтэй тарсан. Энэ талаар ойлголцохгүй байсан учир Н.Энхбаяр зохицуулагчийн үүргээр Монголдоо ирсэн зорилгынх нь нэг. Тэгээд Н.Энхбаярын тэргүүлдэг “Шударга ёс” эвсэл дөрвөн сайдаа хэвээр нь хадгална гэж тохирцгоожээ. Н.Энхбаяр ирсэн зорилгоо биелүүлсэн гэсэн үг.

Дөрөвдүгээрт: 2016 оноос “Шударга ёс” эвсэл АН-тай хамтран ажиллах талаар нилээд ярилцсан байна. Ийм гэрээний төсөл гарч ирээд алга болсон. Ажил болгохоор талууд ярилжээ. Гэхдээ энэ талаар яг ямар тохироонд хүрсэн нь тодоргүй. Учир нь тэд энэ асуудлаа ихэд нууцалжээ.

Тавдугаарт: Шинэчлэгдсэн шинэчлэлийн Засгийн газарт орох сайдуудынхаа талаар санал солилцож зарим нэгэн өөрчлөлтүүдийг хийхээр болжээ. Ерөнхийлөгч Ц.Элбэгдорж давхар дээлтэй сайд нарыг томилуулахгүй. Хориг тавих санаагаа цухуйлгасан. Тиймээс гишүүн биш хүнийг сайдаар томилох бодолтой байна. Ийм хүмүүсийг эвсэлийн зүгээс санал болгохыг Ерөнхий сайд Н.Алтанхуяг хүссэн гэнэ. Уг асуудлыг бодолцож Д.Тэрбишдагаваас бусдыг парламентын гаднаас томилох хувилбар байгааг Н.Энхбаяр хэлжээ. Эх сурвалжийн мэдээлж байгаагаар бол М.Энхсайхан, О.Чулуунбат, Г.Шийлэгдамба, Н.Удвал нарын гуравыг нь сайд болгохоор тодорхой түвшиндээ санал солилцжээ. Өөрөөр хэлбэл Ч.Улаан, М.Сономпил хоёроос татгалзаж байгаа бололтой. Гэхдээ М.Энхсайханы асуудал бол МҮАН-ын мэдлийнх. Тэгээд ч М.Сономпил, Н.Алтанхуяг хоёр Увсынх. Илүү сайн ойлголцдог. М.Сономпилийг М.Энхсайхнаар солих нүүдэл нилээд хэцүү гэж ажиглагчид тайлбарлаж байгаа. Харин Ч.Улааныг Г.Шийлэгдамбаар сольж Н.Удвалыгаа үлдээх магадлал илүү болжээ. Сонирхолтой нь сөрөг хүчин Н.Удвалыг ажлаа хийж чадахгүй учраас огцрохыг шаардаад байгаа. Энэ асуудал ч байдлыг улам л хүндрүүлэх болсон. Ийм шалтгаануудыг бодолцож Н.Энхбаяр сонголтоо хийх бололтой.

Зургаад: Дэд сайд, агентлагын дарга нарыг өөрчлөхдөө ч гэрээнд заасан 75/25 гэсэн харьцаагаа хадгалахаар ярилцжээ.

    Иймэрхүү зүйлүүдийг Засгийг бүрдүүлж байгаа нам, эвсэлийн тэргүүнүүд ярилцжээ.
Сонирхолтой нь Шадар сайд Д.Тэрбишдагва өөрийн албаасаа татгалзаж даргадаа найр тавьсан гэсэн мэдээлэл ирлээ. Өөрөөр хэлбэл Н.Энхбаярыг “Шударга ёс” эвсэлийн тэргүүний хувьд Шадар сайд болох ёстой гэжээ. Харин Н.Энхбаяр Шадар сайд болохоос татгалзаж удахгүй БНСУ явж эмчилгээгээ дуустал тэндээ байхаа хэлж. Эмчилгээний хугацаа гэдэг нь дахиад хагас жилийн ажил байгаа бололтой. Д.Тэрбишдагвын даргадаа тал зассан энэ үйдлийг намынхан нь “уран нүүдэл” хэмээн өөр хоорондоо ярилцсан байна. Ийнхүү Н.Энхбаяр ирсэн зорилгынхоо хамгийн чухалыг биелүүллээ. Харин тэр “Шударга ёс” эвсэлийн мэдлийн дөрвөн сайддаа хэн хэнийг эцэслэн дэвшүүлэх нь өнөө орой тодорхой болно.