Шинэчлэгдсэн шинэчлэлийн Засгийн газар шинэ сайд нарын томилгоо улстөрийн анхаарлыг тэр чигт нь өөр дээрээ татаад байна. Тэгвэл шинэчлэлийн багаас жийгдэгсэдийг ч анхаарахгүй орхиж боломгүй. Урьд өмнө 6 сайдаа цомхтгож байсан зоримог шийдэл гарч байсангүй. Тэд чухам яагаад жийгдэх болсныг сийрүүлэн дүгнэе.

А.Гансүх

Оросын нийтлэлч Василий Иванович “2008 онд А.Гансүх, Х.Баттулга нарын төмөр замын бодлогыг үзсэн. 6000 км төмөр зам барина гэсэн. Энэ бол жинхэнэ солиорол. Төмөр замыг байнга арчилж байх ёстой. Ачаатай ч ачаагүй ч. Монголд ийм хэмжээний нөөц, боловсон хүчин, ачаа гээд аль аль нь байхгүй” гэж бичжээ. Женко Х.Баттулгын гарын хүн гэддэг Монгол төрийн дархлаа хамгаалагч, өмгөөлөгч, сар хүртэл сайн дураараа төмөр зам татагч А.Гансүхийг огцруулах нь хамгийн ойлгомжтой асуудал байлаа. Гарт орсон өргөс мэт багаа самардаг “сэнгүм стайль” хамтлагийн анхлагч Х.Баттулга засгаас сайн дураараа гарсны дараа бөмбөрчин, гитарчин гээд бүх хүмүүсийг Н.Алтанхуяг тайзнаас буулгасан. Цагдаагийн дарга Б.Билэгт, Зам тээврийн яамны төрийн нарийн бичгийн дарга Б.Батзаяа нарын араас сүүлчийн сагсфончин А.Гансүх тайзнаас буулгалаа.

Н.Батбаяр

Түүний тухай олон зүйл бичих нь илүүц. Эдийн засгийн хөгжлийн яам байгуулагдснаар Монгол эдийн засаг унаж эхэлсэн нь маргашгүй үнэн. Тэнгэртэй холбогдож эдийн засгийн тооцоо томьёогоо гаргадаг тэр тив дэлхий дээр ч асар том хувьсгал хийх гэж байсан юмсан. Тодруулбал энэтхэгийн төв банкны захиралтай нийлж АНУ-ын холбооны нөөцийн банкны мөнгөний бодлогыг өөрчлүүлэх байлаа. Гэвч харамсалтай нь түүнд тийм боломж олдсонгүй. Засгийн газрын нэр хүндийг хамгийн ихээр унагаж, Н.Алтанхуягийн эдийн засгийн нэгдсэн бодлогыг алдагдуулсан гол буруутнаар түүнийг нэрлэдэг. Ерөнхийлөгч Ц.Элбэгдорж хүртэл “хөөе Н.Батбаяраа ажлаа өгөө” гээд байхад чихгүй царайлан ширлэж нэлээд гүрийсэн. МАН-ынхан огцруулах асуудлыг нь оруулахад Н.Алтанхуяг хамаг чадал тэнхээгээрээ хамгаалж торгоосон. Гэвч түүнээс болж завиа хөмрүүлнэ гэж юу байхав. Тэнгэрийн амьтныг тэнгэрт нь нисгээд уудам далайдаа хөлгөө залуурдаад явах нь зөв шийдвэр буй за.

Д.Ганхуяг

Гадаадын шулаачдыг хөөж гаргасан түүний гавьяаг мартаж болохгүй. Гаргасан хойноо араас нь гүйх түүний ухаарлыг үнэлэхгүй өнгөрч болохгүй. Уул уурхайн эдийн засагтай Монгол орны уналтын үндсийг тавьсан хүн гарцаагүй мөнөөс мөн. Оюутолгойн гацааг санаачлан эхлүүлж, гардан хэрэгжүүлснээр 4 тэрбум давж байсан гадаадын хөрөнгө оруулалтыг 500 сая болтол буулгасны хариуцлагыг түүнд үүрүүлэхээс өөр замгүй. Канадад болсон уул уурхайн чуулганы үеэр түүнийг гадны хэвлэлийнхэн “dick head” гээд биччихсэн байв. Тэр тэгтлээ л залхааж дээ шар үстнүүдийг. “Discover Mongolia” гадаадын хөрөнгө оруулагчдын чуулга уулзалтын заалыг хов хоосон болгосон гавьяатан бол Д.Ганхуяг бөлгөө.

Л.Болд

Олон төрд сайд явсан түүнийг одоо өмгөөлж ивээх фракц үгүй болжээ. МоАХ-ны гаралтай тэрээр “Алтангадас”-ын ёлконд оролцож гишүүний үнэмлэх авсан сураг ч дуулддаг. Гэвч мэдлэг боловсрол, чадвар туршлагын хувьд арай л дөмгөр гэж үнэлэгддэг тэрээр гадасдаа ган бат мөрөө бэхжүүлж чадсангүй. ОХУ, БНХАУ-ын удирдагч нар Монгол Улсад ээлж дарааллан айлчлахад айлчлалын зохион байгуулалтыг гадаад харилцааны яам биш, эдийн засгийн хөгжлийн яам хариуцсан. Чухам энэ үеэс л Л.Болдын байр суурь ганхаж эхэлсэн нь тодорхой болсон. Нэрт эрдэмтэний хүү, нэлээдгүй чинээлэг эрхэм сайдын суудлаас мултарсан нь “Алтангадас”-ын МоАХ-г арчих оферацийн нэг хэсэг гэж дүгнэх хүмүүс ч цөөнгүй байна.

Ц.Баярсайхан

Давхар дээлийг тайлах санал хураалтанд оролцохгүй гэж УИХ-ын даргад бичиг өгснөөрөө сөрөг хүчиндээ хайрлагдаж өөрийн нөхөддөө зэмлэгдсэн тэрээр Засгийн ажилдаа нэг л ёозгүй ханддаг болсоор удсан гэх. Тэр бүр хэл аманд ороод байдаггүй төв төлөв царай шинжтэй Ц.Баярсайханы УИХ-ын даргад явуулсан бичгээ МАН-ынханд алдсанаасаа болж намынхандаа нам дарамтуулсан гэдэг. Хүсээгүй кнопоо хуруугаараа дарж санал хураалтанд хүртэл оролцсон. Энэ удаагийн хуваарилалтанд “Алтангадас”-ынхан МҮДН, МоАХ-ныг жийж Шонхортой нэлээд эвцэлдэж байгаа нь илэрхий. Фракцын тэргүүнээ сайдын суудлаас “хусуулсан” МҮДН зүгээр суухгүй нь ойлгомжтой. МҮДН-ний эртний кадрууд засагтаа сүсэгүй болсоор удаж байгаа. Тухайлбал Р.Амаржаргал гишүүн “би больё” гэж тэмцээд ч дийлэлгүй албадлагын хөдөлмөр эрхлээд өнөөдрийг хүрч байгаа.

Ч.Улаан

Улсын төсөв нэг триллон төгрөгөөр дутжээ. Ирэх оны төсвийн энэ чигээр нь баталвал амиа хорлоно гэж эхнээсээ дугараад эхлэв. Хотын дарга Э.Бат-Үүл энэ төсөв батлагдвал нийслэл дампуурна гэж мэдэгдсэн. Малын татварын сэргээнэ, тээврийн хэрэгслийн татварыг хоёр дахин нэмнэ, аж ахуй нэгжийн татварыг нэмнэ, нийслэлд амьдарч байгаа бол нэмж мөнгө төлнө гэх мэтээр ард түмнийхээ халаасруу өнгийсөн тонуулч төсөв оруулж ирсэн хэрэгт гол буруутгагдаж байгаа хүн бол сангийн сайд Ч.Улаан. Түүний өргөн мэдүүлсэн төсөв Засгийн газарт хасах оноо авчирсан. Гэвч энэ нь асуудлын зөвхөн нэг тал. Гүн харвал Ч.Улааны хувьзаяаг Н.Энхбаяр шийдчихэж байгаа бололтой. Ч.Улаан ер нь хэзээ Н.Энхбаярт үнэнч байгаагүй. МАХН1-д байхдаа МАХН2-д элсэхдээ ч.

Д. Тэрбишдагва

Уг нь Н.Энхбаярын төрийн хамгаалалтыг буулгаж жинхэнэ утгаараа тэр иргэн болсон. Гэтэл үлээвэр хөгжимтэй, улаан гэрэлтэй машинаар түүнийг төрийн өндөрлөгийн хэмжээнд сүржин угтсан үзүүлбэрийг олон нийт төдийлөн анзаарсангүй. “Дээрхийн гэгээн”-ийг угтах үзүүлбэрт гоцолсон, хүч хаясан хүн бол шадар сайд Д.Тэрбишдагва. Түүний зангараггүйгээр төрийн үлээвэр найрал хөгжмийг нисэхийн коридорт жагсаах боломжгүй гэх.  Богд эзэндээ суудлыг нь залья гэж найр тавиад ч тэрээр тусыг эс олвой. Н.Энхбаярын хайрыг татах мэргэн нүүдэл хийсэн ч тэрээр тусыг эс олж эзнийхээ төлөө үнэнч байгаагүй гэдэг хатуу зэмлэлийг хүртэж байна. Ялангуяа намын дэд дарга байж Ж.Эрдэнэжамьяаныг хэлмэгдүүлэхэд юу ч хийгээгүй, намын даргад нь дахин эрүүгийн хэрэг үүсгэж байхад засагт нөлөөтэй шадар сайдынхаа зангарагийг харуулаагүй гэх шүүмжлэл түүнийг ороож унагахад хүргэжээ. Гэвч тэр унахгүй зүүгдэж үлдэхээр үлдэхээр үхэлдэн тэмцэж байгаа гэх. “Ард ЗХУ бий шүү!” гэдэг шиг Н.Алтанхуягт л хамаг найдвараа тавьчихаад байна.