Эдийн засгийн байнгын хорооны хуралдаан болж, сайд нарыг чөлөөлөх тухай асуудлыг хэлэлцэх үеэр МАН –ын бүлэг завсарлага авлаа. Тэд байнгын хороогоор хэлэлцэж байсан Уул уурхай, эрчим хүчний сайдаар тус яамны Төрийн нарийн бичгийн дарга Р.Жигжидийг томилох тухай асуудалтай холбоотойгоор завсарлага авсан юм. Энэ талаар МАН-ын бүлгийн дарга С.Бямбацогт тайлбарлахдаа “Засгийн газрын бүтэц, бүрэлдэхүүний тухай асуудлыг УИХ-д оруулж ирэхдээ Ерөнхий сайд оочин, цоочин оруулж ирж байна. Өнөөдрийн хуралдаанаар Гадаад харилцаа, хамтын ажиллагааны сайд, Зам, тээвэр, барилга хот байгуулалтын сайд нарыг томилох асуудлыг давхар хэлэлцэх ёстой байсан. Гэтэл зөвхөн Уул уурхайн сайдыг томилох тухай оруулж ирлээ. Дээр нь МАН-ын бүлэг хариуцлага тооцох асуудлыг орхигдуулж болохгүй гэдгийг Ерөнхий сайдад удаа дараа мэдэгдсэн. Харамсалтай нь, энэ асуудал дарагдаж, сайдууд чөлөөлөгдсөнөөр асуудлыг нэг талд нь шийдэх болж байна. Тиймээс УИХ дахь МАН-ын бүлэг асуудлыг цогцоор хэлэлцэх ёстой хэмээн үзэж, тав хоногийн завсарлага хүсч байна” гэв. Мөн тус байнгын хороогоор сайдын үүрэг гүйцэтгэгч нарыг албан тушаалаас нь чөлөөлөхөөр шийдвэрлэсэн байна.