Засгийн газар өнөө өглөө 2015 оны төсвийн тухай хуулийн төслийг УИХ-ын гишүүдэд тарааж өгчээ. Өмнө өргөн бариад МАН-ын шахалтаар буцаан татсан юм. МАН-ынхан "Сайд нараа томилсоны дараа төсвөө хэлэлцье. Яам нь байхгүй болсон байхад төсөв оруулж ирсэн. Сайдгүй, яамны төсвийг яаж хэлэлцэх гэсэн юм бэ" гэж маргасан.

    Ингээд шинээр нэгтгэсэн яамдууддаа тааруулж хийсэн төсвөө өнөө өглөө гишүүдэд тарааж өгөөд, УИХ-аар хэлэлцүүлэх гэсэн нь баахан маргаан дагууллаа. Учир нь УИХ-ын гишүүн М.Зоригт "Төсвийн тухай хуулийг өнөөдөр тарааж өгсөн, уншиж амжаагүй байна. Шууд хэлэлцүүлэх гээд Засгийн газар шахаад байх юм" гэсэн бол Ё.Отгонбаяр "Төсвийн төслийг өглөө тараагаад одоо хэлэлцэх гэж байна. 510 хуудас юмыг 1 цагт уншаад ойлгоно гэж Засгийн газар үнэлдэг юм байна" гэж бухимдлаа илэрхийллээ. Ингэж удтал маргасны эцэст ирэх долоо хоногоос 2015 оны төсвийн тухай хуулийг хэлэлцэхээр хойшлуулав.