Ардчилсан нам өөрсдийгөө ил шархалж ил эдгэрдэг, Харин МАН-ынхан далд шархалж бугладаг гэж ярих дуртай. Үнэхээр ч АН-ынхан хоорондоо зөрчилдөж байхад олон нийт төдийлөн гайхаад байдаггүй. Харин МАН-ынхан зөрчилдөөд эхлэхээр л гайхаж хүлээж авдаг нийгмийн хандлага бий болоод удажээ. АН-ынхан асуудлаа дотроо нээлттэй ярилцаж, шүүмжилж мэтгэлцсээр ирсэн. Харин тэдний ардчилсан чөлөөт зарчим энэ хүрээд дуусч байгаа бололтой.

    Өнгөрөгч долоо хоногт “Монголын ардчилал 1990-2014 он” гэсэн эмгэнэл илэрхийлсэн ухуулга хуудас төрийн ордноор тарсан. Энэ нь АН-ын үед Монголд ардчилал үгүй боллоо гэсэн санаа байв. Үүнийг цөөнгүй гишүүд дэмжиж твиттер хуудсандаа оруулсан. Тэгвэл АН-д үнэхээр дотоод ардчилал гээч зүйл үгүй болсныг тод харуулах үйл явдал ар араасаа цуврах боллоо.

    Тухайлбал өнгөрөгч хавар АН-ын хяналтын хороо хуралдаж УИХ-ын гишүүн Р.Бурмааг намаас хөөсөн шийдвэр гаргаж олны гайхшруулсан. Үүнд АН-ын олон мянган гишүүн эсэргүүцлээ илэрхийлж “ард түмний төлөөлөл болсон УИХ-ын гишүүнийг итгэл үнэмшлээрээ санал өгсний төлөө хөөх нь шударга бус” гэдгийг дуу нэгтэй хэлцгээж байв. Үүнтэй УИХ-ын дарга З.Энхболд ч санал нэгдэж Р.Бурмаа гишүүнийг намаас хөөсөн явдлыг эсэргүүцснээр байдал нэг хэсэгтээ намжаад байгаа. Тэгээд ч Р.Бурмаа гишүүн намынхаа эсрэг үйл ажиллагаа явуулж, Засгийн газрыг огцруулья гэсэн санал өгөөгүй. Ердөө л УИХ-ын гишүүн Засгийн газрын гишүүн байж болохгүй гэсэн хуулийн төлөө л саналаа өгсөн юм.

    Тэгвэл Р.Бурмаа гишүүнээс ч илүү хурцаар намынхаа удирдлагуудыг шүүмжилж Засгийн газрыг огцруулах бичигт ганцаараа гарын үсэг зурсан Ж.Батзандан гишүүнийг намаасаа хөөх чиглэлийг намын удирдлагууд нь хяналтын хороондоо өгчээ. Ингэж Засгийн газрынхаа эсрэг бодолтой байгаа гишүүдээ хүчээр дарж авах замыг тэд сонгосон бололтой. Үүний дагуу өнгөрсөн баасан гарагт Баянзүрх дүүргийн АН-ын хороо хуралдаж Ж.Батзандан гишүүний асуудлыг нэлээд нухацтай ярилцажээ. Хуралдаанд ардчиллын ахмад партизанууд оролцсон бөгөөд Ж.Батзанданг намаас хөөх нь зүйтэй гэж нэлээд шүүмжилсэн байна. Харин тус хуралд залуучууд нь оролцоогүй гэх мэдээлэл байна. Гэхдээ ингэж хуралдаад тэд ямар нэгэн шийдэлд хүрч чадалгүй таржээ.

    Ийнхүү АН-ын удирдлагууд өөрсдийнхөө эсрэг дугарсан нэгнээ намаасаа хөөж, шахан зайлуулах явуургүй аргыг хэрэглэж эхэлсэнд олон гишүүд нь бухимдалтай байна.

    Хамгийн ноцтой нь зөвхөн Ж.Батзанданг хөөгөөд зогсохгүй намынхаа бодлогыг дэмжихгүй байгаа гишүүддээ цаашид ч хариуцлага тооцох ёстой гэсэн чиглэлийг намын удирдлагууд нь өгсөн гэнэ. Тухайлбал өнгөрсөн бямба гарагт Н.Алтанхуяг, Н.Энхбаяртай хамтран ажиллах гэрээ байгуулсныг тус намын маш олон гишүүд эсэргүүцэж байгаа юм. Ардчилсан хувьсгалын анхдагч Баабар “2017 онд АН-аас Н.Энхбаяр Ерөнхийлөгч болохыг үзээд үхэх юм байна л даа” гэж байр сууриа илэрхийлсэн бол УИХ-ын гишүүн М.Зоригт “Н.Энхбаяртай гэрээ байгуулахыг нь мэдсэн бол Ж.Батзандантай хамт гарын үсэг зурдаг байж ” гэж жиргэв.

    М.Зоригт гишүүн ч мөн ингэж жиргэснийхээ төлөө намаасаа хөөгдөх дээрээ тулсан гэдгийг эх сурвалж хэлж байна. М.Зоригт маш эртнээс намын даргынхаа эсрэг янз бүрийн үг, үйлдэл үзүүлэх болсон. Гэтэл үүнд ямар ч арга хэмжээ авахгүй байна гэж АН-ын удирдлагууд хяналтын хороогоо дарамталж эхэлсэн гэнэ. Ж.Батзандангаас гадна М.Зоригтын асуудлыг ч АН-ын удирдлагууд ярьж эхэлсэн гэдгийг эх сурвалж мэдээллэж байгаа юм.

    Цаашлаад намынхаа бодлогыг эсэргүүцэж Н.Энхбаяртай хийсэн гэрээг эсэргүүцэж байгаа хүмүүсийг намаасаа хөөнө гэдгийг хатуу мэдэгдсэн гэв. Ийнхүү шүүмжлэлийг дарж, эсэргүүцэгчдийг дарах замаар байр сууриа хадгалж үлдэхээр АН-ын дарга нар шулуудсан гэв.

     АН-ын өнөөгийн удирдлагуудын үед АН-ын дотоод ардчилалд бодитой аюул нүүрлэж эхэллээ. АН-ын дотоод ардчилалд аюул нүүрлэбэл энэ нь Монголын ардчилалд ч том асуудал дэгдээх нь дамжиггүй бизээ.