Ордос залуусыг хууль бусаар Монгол Улсаас албадан гаргаж байна гэж “Нэгдсэн Монгол” хөдөлгөөнийхөн олон нийтэд хандлаа. Өнгөрсөн нэг жилийн хугацаанд 40 орчим өвөрмонгол иргэнийг албадан гаргажээ. Хөдөлгөөнийхний хэлснээр манай хууль хяналтын байгууллагынхан тэдгээр иргэдийг үндэслэлгүйгээр Монгол Улсаас хөөсөн бөгөөд эрхийг нь ноцтой зөрчсөн гэж үзэж байна. Тодруулбал, Монгол Улсад 2006 оноос суралцаж амьдарч байсан Д.Далайбаатар нарын гурван залууг өнгөрсөн тавдугаар сард албадан гаргасан юм байна. Гадны улсын иргэдийг албадан гаргах үндэслэл нь Монгол Улсын хууль тогтоомжийг зөрчсөн эсэх. Тиймээс тэдгээр ордос залуус ямар зөрчил гаргасан талаар “Нэгдсэн Монгол” хөдөлгөөний тэргүүн Ч.Мөнхбаяр тодруулахад “Залуус манай улсыг өөрийн нутаг шиг бодож олон жилийн өмнөөс сурч боловсорч ирсэн. Тухайлбал, Д.Далайбаатар монгол соёл урлагт шимтэж найм дахь жилдээ суралцаж байсан залуу. “Дэлхийн Монгол оюутан” клуб, “Өмнөд Монголын залуучуудын холбоо”-г нөхдийнхөө хамтаар байгуулаад оюутнуудыг хөгжүүлэхэд анхаардаг сэхээтэн залуу байсан. Гэтэл манайхан тэднийг ямар хууль зөрчсөн нь тодорхойгүй, албан баримт бичиг, сануулга байхгүйгээр хуурч мэхлээд БНХАУ руу гаргачихсан. 10 жил Монголд нэвтрэхийг хориглосон тамга дарчихсан. Энд найман жилийн турш амьдарч, сурч байсан хүмүүс ямар ч бэлтгэлгүйгээр хилийн цаана амьдрахад бэрх болоод байгаа. Монгол Улсын Ерөнхийлөгч “Олуулаа болцгооё” гэж уриалсан. Ордос залуус олонх нь Ерөнхийлөгчийн уриалгыг дэмжиж талархалтайгаар хүлээн авч ирсэн байдаг. Гэтэл эргээд тэднийг хууль бусаар амьдрах, сурч боловсрох эрхийг нь зөрчиж байгаа нь харамсалтай байна” гэлээ. Хөдөлгөөнийхөн цаашид ордос залуусыг Монгол Улсад нэвтрэх эрхийг нь сэргээлгэх, сургуульдаа үргэлжлэн суралцуулах боломжоор нь хангах талаар тууштай тэмцэхээ мэдэгдсэн юм.