АН-ын гишүүд бид "амь биеэ алдартал, арван хуруугаа тамтартал" ардчиллын төлөө зүтгэж ирсэн. Гэтэл манай намын дарга Та АН-ын гишүүд биднээс асуулгүй "авлигын загалмайлсан эцэг" гэгдэх Н.Энхбаяртай 10 жил хамтран ажиллах гэрээ байгуулж, ээлж дараалан Ерөнхийлөгч, Ерөнхий сайд болох гэж санаархлаа. "Авлигын загалмайлсан эцэг"-ийн төлөө АН-ын мянга мянган гишүүнээ золиосолж байгаад гүнээ харамсаж байна. Тиймээс намын дүрмээ зөрчиж, гишүүдийнхээ эрх ашгийг авлигачийн ашиг сонирхлоос дорд үзэж байгаа АН-ын дарга Н.Алтанхуяг таныг нэн даруй огцрохыг шаардъя. АН-ын мянга, мянган гишүүн бид Н.Алтанхуяг таныг дараах 10 асуултад хариулж ажлаа нэн даруй өгч, сайн дураараа огцрохыг тулган шаардаж байна.

1.    Та намын гишүүдээсээ асуулгүй МАХН-тай 10 жил хамтран ажиллах гэрээ байгууллаа. Тиймээс таныг өөрийн намын УИХ, ҮЗХ-ны гишүүддээ биш Н.Энхбаярт итгэлээ. Н.Алтанхуягт АН-ын гишүүд Н.Энхбаяраас доогуур үнэлэгддэг гэсэн дүгнэлт гарах боллоо. Санал нийлэх үү?

2.    Таныг огцруулах асуудлыг МАН манай намын зарим гишүүдтэй хамтран тавьсан. Тиймээс Н.Алтанхуяг таны аврал УИХ, ҮЗХ-ны гишүүд биш ганцхан Н.Энхбаяр байж чадах уу? Энэ сонголтондоо хэзээ нэгэн цагт харамсахгүй юу?

3.    Н.Энхбаяр дарга та хоёр 2016, 2020, 2024 оны УИХ-ын, 2017, 2021 оны Ерөнхийлөгчийн сонгуульд хамтарч ялалт байгуулахаар гэрээндээ заасан байна.  2020, 2024 он биш 2016 онд ялна гэсэн итгэл Танд байна уу?

4.    Н.Энхбаяр та хоёр ирэх сонгуулиудад ээлжилж Ерөнхий сайд, Ерөнхийлөгч болох санаархалтай байгаа нь байгуулсан гэрээнээс чинь үнэртэж байна. Та үгүй гэж бодож байгаа бол тэр үгээ хэлж чадах уу?

5.    Манай нам авлигатай тэмцэнэ, авлигыг устгана гэж ард түмнээс санал авсан. Харин одоо авлигын асуудлаар ял сонссон хүнтэй 10 жилийн гэрээ байгууллаа. Ингэснээр авлигатай тэмцэнэ гэдэг хамгийн чухал үнэт зүйлээ гээж байгаагаа эргэцүүлж үзээгүй юу?

6.    Манай нам таны үед авлигачдыг хамгаалж, өмгөөлж, хамтран ажиллах гэрээ байгуулдаг боллоо. Тиймээс АН гэсэн товчлолыг Авлигач Нам гэж задлан тайлбарлаж жирийн иргэд биднийг доромжилж эхлээд байна. Одоо бид хариу юу гэж хэлэх вэ?

7.    Монгол Улсын Ерөнхийлөгч Ц.Элбэгдоржид ийм гэрээ байгуулахаа ярьж хэлсэн үү. Хэрэв хэлсэн бол намын нөхдөдөө хэзээ, хаана хэлж ярилцсанаа тайлбарлана уу?

8.    Та өмнө "Ардын Нам, Авлигатай тэмцэх газар хоёр ажил хийлгэхгүй байна" гэж мэдэгдэж байсан. Мөн АТГ "Засгийн газрын тэргүүний зүгээс хийж байгаа мэдэгдлүүд, Засгийн газрын зүгээс манай байгууллагад хандаж байгаа хандлага санаа зовоож байна. Засгийн газар, түүний харьяа агентлагууд АТГ-тай хамтран ажиллах бүх ажиллагааг зогсоож байна" гэж мэдэгдсэн. Та АТГ-аас айж, АТГ-ын бүх ажлыг гацааж Н.Энхбаяртай хамтарч байгааг юу гэж ойлгох вэ?

9.    Та Н.Энхбаяртай гэрээ байгуулчихаад М.Энхсайханыг яагаад ганцаардуулж орхисон бэ. Түүнийг "гэрээ байгуулах хэмжээний хүн биш" гэж үнэлсэн гэж үнэн үү?

10.    Нийслэл, дүүрэг, 21 аймгийн манай АН-ынхан нийлж Н.Энхбаяртай байгуулсан гэрээг цуцалж, хариуцлага тооцох асуудал ярьж эхэлбэл Танд байгуулсан гэрээгээ цуцлах эр зориг бий юу?