Нийслэлийн Ардчилсан намын дарга, Улаанбаатар хотын засаг дарга, Улсын баатар Э.Бат-Үүл намынхаа дарга Н.Алтанхуягийг Н.Энхбаяртай гэрээ хийсэнд маш их эгдүүцэж хурцаар байр сууриа илэрхийлж эхэлсэн. Түүнийг дагаад АН-ын аймаг орон нутгийн хороод, зарим гишүүд байр сууриа илэрхийлж Н.Алтанхуягтай хариуцлага тооцох тухай асуудлыг хөндөж эхэлсэн нь АН-ын дотоод улстөрд жинхэнэ сонирхолтой үзэгдлийг бий болгоод байна. Тэгвэл Э.Бат-Үүл хоёрдугаар суваг телевизийн “Цензургүй яриа” нэвтрүүлэгт оролцож Н.Алтанхуягийг жинхэнэ “бут ниргэлээ”. Тэрээр Н.Алтанхуяг энэхүү гэрээг байгуулахдаа дагуулж орсон сайд нартаа ч хэлээгүй. Нөгөө хэд нь юу болж байгааг мэдэхгүй бантсан царайтай зогсож байсан гэдгийг онцлов. “Зүгээр явж байхад нь дагуулаад ийшээ орьё энд хурал болж байна гээд орчихсон. Тэнд байгаа сайд нар ч юундээр гарын үсэг зураад байгааг ойлгоогүй” гэж тэнд байсан сайд нар ярьсан бололтой.

    Энэхүү гэрээнд гарын үсэг зурсан өдрөөс эхэлж АН нь МАХН-ын барьцаанд орлоо гэв. Энэ гэрээг байгуулсныг сонсоод Э.Бат-Үүл гишүүн балмагдаж, цочирдон, нойргүй хоносон гэдгээ дуулгав.

    Тэрээр “Н.Энхбаяр өөрийгөө хэлмэгдсэн гэж ярьдаг. Ингэж хэлмэгдэж байгаа бол хэлмэгдэл гэдэг тийм ч муу зүйл биш болж таарч байна. Н.Энхбаяр бол одоо зүгээр эрхлээд явж байна.  Хөгжилтэй оронд очиж эмчлүүлээд, хүрч ирээд л нөгөө авилгын газар нь хөлс чахраад айгаад зугтаачихсан. Ерөнхий сайд нь угтаж аваад, ордонд хоёулаа уулзаад идэж уугаад байгаа сурагтай...

    Манай улстөр амьтанлаг адгууслаг түвшинд очиж. Бид амьтнаас нэг юмаар ялгардаг. Тэр нь өөрийн үнэт зүйлтэй, зарчимтай, өөрийн нэр төр гэж эрхэмлэдэг юмтай. Гэтэл Н.Алтанхуяг өөрийнхөө эрх мэдлийг хадгалж үлдээж байгаа хэнд ч очоод юу ч өгөхөд бэлэн байна. Ардчилсан намыг байтугай, Монголын хэрэг явдлыг сонирхож байгаа хэн нэгэн ирээд чамайг ерөнхий сайд байлгая, чи улсаа бариад ирээ гэвэл... 1919 онд яг ийм юм болсон. Та нарын цалин пүнлүүг өгье, албан тушаалыг чинь хадгалья. Харин та нар Монгол Улс дундад улсын нэг хэсэг гээд тогтоол гаргачих л гэсэн. Ерөн оноос хойш өнөөдрийг хүртэл дэнтэй дунтай явсан ихэнхи  өдрөө манай намын олон мянган гишүүд гудамжинд өнгөрөөсөн. Үр хүүхдийнхээ нүүрийг ч харж чадахгүй байна гэж олон ч гишүүн хэлж байсан. Ардчилал гээд яваад л байдаг, танай нам гэж яачихсан нам юм, сонгогддог ч үгүй, тэгээд л дандаа гудамжинд аав ээж минь явж байхыг харах амаргүй байна гэж үр хүүхэд нь ярьж байхад тэсээд гарч байсан. Дарангуйлал тогтчих аймшигтай цаг үед энэ нам л түрүүлж хөдөлсөн.  Манай намын залуу хөгшин олон гишүүн одоо бид нар үр хүүхдүүдийнхээ өмнө бардам байна гэж байсан. Гэтэл үүнийг цохиод унагачихлаа. Нүүрээ хийх газаргүй болгож байна.

    Энэ бүх үгийг хэлснийхээ төлөө тэрээр хотын даргын алба тушаалаа ч алдахаас айхгүй гэдгээ мэдэгдэв. Би ардчиллын үнэт зүйлийн төлөө, зүгээр нэг хотын даргын суудлаа хамгаалах гээд нэр төрөө хөсөр хаях хүн биш гэж хоёрдмол утгагүй хэллээ.
 
    Өнөөдрийг хүртэл Ерөнхий сайдыг огцруулахын эсрэг тэмцэж ирсэн Э.Бат-Үүл “Одоо бол яриа байхгүй” гэж мэдэгдлээ. Ийнхүү АН-ын үүсгэн байгуулагч нөлөө бүхий улстөрч Э.Бат-Үүл намын даргадаа хариуцлага тооцохоор хөдөлж эхэлсэн нь энэ намрын улстөрийг халуухан болгох төлөвтэй байна.

    Тэрээр намаасаа сонгогдсон УИХ-ын гишүүдэд хандаж “Одоо битгий эргэлз, Ерөнхий сайдыг огцруулах асуудлыг дэмжээч, намаа аврая л гэж байгаа бол наад хүнээ зайлуулаач гэж хэлж байгаа. Би Ерөнхий сайдыг огцруулахад хатуу эсэргүүцдэг байсан. 1996-2000 оны сургамж байна. Одоо бол надад тийм юм байхгүй. Н.Алтанхуягийг огцруулах нь манай намын гишүүний нэр төрийн ажил юм шүү гэдгийг сануулж байна.