Чуулганы нэгдсэн хуралдаанаар 2015 оны Төсвийн тухай хуулийг хэлэлцэх үеэр УИХ-ын гишүүн Ц.Нямдорж шүүгчдийн цалинг УИХ-ын шийдвэргүйгээр хууль зөрчиж нэмсэн талаар дурьдаж шүүмжиллээ. Тэрбээр мөн шүүгчдийг хэдэн төгрөгийн цалин авч байгааг асуусан юм.

Түүний асуултад Шүүхийн ерөнхий зөвлөлийн дарга Н.Лүндэндорж хариулахдаа "Анхан шатны шүүхийн шүүгч 2.3 сая, дунд шатны шүүхийн шүүгч 2.8 сая, Улсын дээд шүүхийн шүүгч 3.2 сая төгрөгийн цалин авч байгаа" гэв.  Мөн Улсын дээд шүүхийн Тамгын хэлтсийн дарга Ж.Наранпүрэв “Шүүхийн ерөнхий зөвлөлийн 2013 оны 45 дугаар тогтоолын дагуу Улсын дээд шүүхийн шүүгч 3.2 сая, ерөнхий шүүгч 3.3 сая төгрөгийн цалинг энэ оны 10 дугаар сараас эхлэн авч байгаа” гэсэн хариулт өгсан юм.

    Харин үүнтэй холбогдуулан УИХ-ны дарга З.Энхболд “Цалинг УИХ тогтоодог хуультай. УИХ-ын тогтоол хүчин төгөлдөр байхад Шүүхийн ерөнхий зөвлөлийн хууль бус шийдвэрийг мөрдөх эрх байхгүй” гэдгийг анхааруулаад Хууль зүйн байнгын хороо энэ асуудалд анхаарахыг сануулав. Ингэснээр шүүгчдийн цалингийн асуудал байнгын хорооны түвшинд дахин яригдах нь. Хэрвээ хууль бусаар нэмсэн нь батлагдвал Шүүхийн ерөнхий зөвлөлийн удирдлагууд хариуцлага хүлээх юм.