УИХ дахь МАН-ын бүлгийн гишүүд намынхаа Удирдах зөвлөл, нийслэлийн намын хорооны удирдлагуудын хамт Баянзүрх дүүрэгт байрлах их, дээд сургуулийн оюутнуудтай уулзаж,  зарим худалдааны төвөөр орж ард иргэдийн санал бодлыг сонслоо. Тэд гурван багт хуваагдан ажилласны нэг нь УИХ-ын гишүүн Сү.Батболд, Д.Сумъяабазар, Б.Чойжилсүрэн  нараас бүрдсэн баг бөгөөд тэд  “Улаанбаатар” их сургууль болон Нарантуул худалдааны төвд очиж, оюутан залуус, худалдаа эрхлэгчидтэй уулзсан юм. 


Эхлээд тэд Улаанбаатар их сургуулийн оюутнуудтай уулзаж, тэдний санал бодлыг сонссон. Оюутнуудын зүгээс ээж аавынх нь цалин нэмэгддэггүй хэрнээ сургалтын төлбөр өсөөд байдаг, сургалтын төлбөр өсөөд байгаа хэрнээ сургалтын чанарт ахиц гардаггүй гаж тогтолцоо "усан хаван" мэт улам хүрээгээ тэлсээр байгааг “ховлов”. Мөн үнийн өсөлтөд дарлуулж байгаагаа ч нуусангүй. Гишүүд болон багш оюутнуудын уулзалт ажил хэрэгч уур амьсгалтай болсныг дурдах нь зүйтэй байх. Энэ үеэр УИХ-ын гишүүн, Ерөнхий сайд асан Сү.Батболдтой уулзаж, уулзалтын зорилго ач холбогдлыг талаар лавлахад ”МАН-аас ард иргэдтэйгээ уулзах уулзалтыг тогтмол зохион байгуулдаг. Салбар салбарынхантай уулзаж, тэдний санал бодлыг сонсох нь их чухал. Өнөөдрийн хувьд бидний хэдэн гишүүд  Улаанбаатар их сургуулийн багш, оюутнуудтай уулзлаа. Улс орны хөгжлийн хамгийн том гарц бол өндөр боловсролтой, чадварлаг ард иргэдтэй байх нь хамгийн чухал. Хөгжлийн хамгийн том гарц ч гэж хэлж болно. Тэр ч утгаар би боловсролын салбарт их ач холбогдол өгч ирсэн. Миний тэргүүлж байсан Засгийн газрын үед Хүний хөгжлийн сан байгуулж, ард иргэддээ дэмжлэг үзүүлэхийн зэрэгцээ сургалтын төлбөр, боловсролын стандартыг дээшлүүлэх талаар тодорхой ажлуудыг хийж ирсэн. Энэ бүх ажилд сайн зүйлүүд байсан ч бас анхаармаар зүйл ч байсан байна. Үүнийг дүгнэж ярьсан ажил хэрэгч уулзалт боллоо. Цаашдаа боловсролын салбараа бид тогтвортой, ойлгомжтой, хөгжлийн ирээдүйг харсан, улс орны хөгжлийн нэгэн адил авч үзэх ёстой юм байна гэдэгтэй багш оюутнуудтай санал нэгдлээ” хэмээн ярьсан юм.


 Мөн дараа нь тэд  “Нарантуул” олон улсын худалдааны төвд ажиллалаа.  Наймаачдын зарим нь “гэнэтийн зочид”-ыг гайхан хүлээн авч байсан бол,  нөгөө хэсэг нь өөрсөддөө тулгамдаж байгаа асуудлуудыг УИХ-ын түшээддээ  илэн далангүй ярьж, шийдвэрлэх арга замын талаар лавлаж байв. “Нарантуул”-ынхны хамгийн их хөндсөн асуудал нь орлого эрс муудсаныг онцолж байв.   Өнгөрсөн оны мөн үетэй харьцуулахад ард иргэдийн худалдан авах чадвар маш их буурсан байна.  Тэгсэн хэрнээ талбайн түрээсийн төлбөр өндөр байгааг хэлж байлаа. Түүнээс гадна одоо хүйтний улирал эхлэх гэж байгаатай холбоотой ажиллах орчин хүнд байгааг хэлсэн. Тэд “Бид энэ асуудлыг үе үеийн улстөрч, эрх мэдэлтнүүдэд хэлдэг ч шийдвэрлэлгүй өдийг хүрсэн. Та бүхэн тэдний нэгэн адил энд сайхан зүйл яриад, саарал ордондоо ормогц мартчихдаг шүү гэх шүүмжлэлийг ч хэлээд авна лээ. Ингээд УИХ-ын гишүүн Сү.Батболдтой уулзаж цөөн асуултад хариулт авлаа.
-    Та Ерөнхий сайд байхдаа Нарантуул захаар хэд хэдэн удаа явж байсныг тань санаж байна. Энэ удаа танд юу анзаарагдав, таны явж байсан үетэй харьцуулахад хэрхэн өөрчлөгдсөн байна вэ?

-    Тийм ээ. Би Засгийн газрын тэргүүн байхдаа Нарантуул захын үйл ажиллагаатай танилцаж, энд ажиллаж байгаа иргэдтэйгээ уулзаж байсан. Хэд хэдэн зүйл ажиглагдлаа. Наймаачдын орлого өдөрт 500 мянган төгрөгөөс буудаггүй байсан бол одоо 100 мянган төгрөг хүрэхтэй үгүйтэй л болсон гэж ярьж байна. Өөрөөр хэлбэл, бараа үйлчилгээнийх нь борлуулалт эрс буурчээ. Янз бүрийн зүйл худалдан авахаасаа илүү өдөр тутмын хоол ундандаа хамаг мөнгөө зарцуулж байгаагаа хэллээ. Жижиг дунд үйлдвэрлэгчдийн бүтээгдэхүүн зарагдахгүй байгаагаас ажлын байр нь хумигдаж байгаа юм байна.  Тэднийг дэмжих дэмжлэг дутуу, нээлттэй биш, санхүүгийн их боломж яригдаж байгаа мөртлөө хүртээмж, ил тод байдал нь хангалтгүй байна гэж тэд ярилаа. Мөн ам.доллар, юаньтай харьцах төгрөгийн ханш суларснаас үүдсэн бэрхшээлийг иргэд их ярьж байна.

-   Нийгмийн хамгаалал, тухайлбал нийгмийн даатгалаа төлдөг баймаар байна гэж  ихэнх иргэд  ярьж байсан. Таны тэргүүлж байсан Засгийн газрын үед энэ талаарх эрх зүйн орчин бүрдсэн байсан гэж таны хариулахыг сонслоо. Энэ талаар та дэлгэрүүлж ярина уу?

-   Наймаа эрхэлж байгаа тэднийг  нийгмийн даатгалд хамруулах хууль эрх зүйн үндэс нь  манай Засгийн газрын үед хийгдсэн. Хэрэгжилт, гүйцэтгэл нь удааширалтай яваа юм байна. Өөрөө төлж байгаа хэсэг нь байхад ихэнх нь шимтгэлээ төлж чадахгүй байгаа гэж ярилаа. Зохион байгуулалтын ажил хэрэгтэй байгаа юм байна гэж харлаа. Энэ олон хүн тэттгэвэргүй болох асуудал яригдаж байна.