УИХ –ын чуулганаар төсвийн асуудлыг хэлэлцэж байна. Үүнд сөрөг хүчин болох МАН -ынхан дарга нарын тансаглалыг нэмсэн хэрнээ хөрөнгө оруулалт бүтээн байгуулалтанд бага мөнгө төсөвлөсөн муу төсөв боллоо гэж шүүмжилж байна. Тухайлбал МАН –ын дарга, УИХ –ын дэд дарга М.Энхболд “Бүх сайд нарын урсгал зардал нэмэгдсэн байна. Гэтэл бид урсгал зардлыг танах хэрэгтэй гэж тохирсон. Одоо байгаа төвшингээс 20 хувиар хэмнэе гэдэг зүйлийг ярилцсан. Гэтэл нийлбэр дүнгээрээ урсгал зардал 833 тэрбум төгрөгөөр нэмэгдсэн байна. Тэгсэн хэрнээ хөрөнгө оруулалт, бүтээн байгуулалтын зардлаас 500 тэрбум төгрөгийг хассан байна. Энэ ямар учиртай юм бэ” гэж байр сууриа илэрхийллээ.