УИХ -ын чуулганаар өнөөдөр төрөөс мөнгөний бодлогын талаар 2015 онд баримтлах үндсэн чиглэл батлах тухай Улсын Их Хурлын тогтоолын төслийг хэлэлцэж байгаа. Хууль санаачлагчийн илтгэлийг Монголбанкны ерөнхийлөгч Н.Золжаргал танилцуулсан. Тэрээр "...2015 онд гадаад валютын орох урсгал мэдэгдэхүйц нэмэгдэж, төлбөрийн тэнцэл эрс сайжрахгүй байх тохиолдолд эдийн засгийн бодит секторыг мөнгөний бодлогоор дэмжих боломж улам бүр хязгаарлагдах, эдийн засгийн тогтвортой өсөлтөд шаардагдах мөнгөний нийлүүлэлтийн хэмжээ дутагдах, улмаар төлбөрийн тэнцлийн хямралаас шалтгаалж эдийн засагт үүссэн хүндрэл ужгирах эрсдэлтэй гэж үзэж байна. Эдийн засгийн өсөлтийн ойрын төлвийг нийт эрэлт болон үйлдвэрлэлийн салбараар авч үзвэл өрхийн болон Засгийн газрын хэрэглээ, гадаад болон дотоод хөрөнгө оруулалт буурахаар байгаатай уялдан дотоод эрэлт, нийт хуримтлал багасах хүлээлттэй байгаа тул ДНБ-ий бодит өсөлт 2014 оны эцэст өмнөх оноос буурч гарахаар хүлээгдэж байна. Хэрэв ирэх онд төлбөрийн тэнцэл сайжрахгүй, мөнгөний нийлүүлэлтийн бүтэц дэх гадаад цэвэр актив огцом нэмэгдэхгүй, хэрэглээ, хөрөнгө оруулалт буурч байгаа хандлага үргэлжлэх тохиолдолд нийт эрэлтийг тэтгэх, хөрөнгө оруулалтыг нөхөх гол бүрэлдэхүүн нь цэвэр экспорт л байх төлөвтэй болов. ...Гадаад валютын орох урсгал нэмэгдэхгүй, гадаад цэвэр актив буурсаар буй орчинд мөнгөний нийлүүлэлтийг огцом тэлэхээс зайлсхийж, мөнгөний бодлогыг төсвийн болон макро зохистой бодлоготой уялдуулах замаар төлбөрийн тэнцлийн хүндрэлийг зөөлрүүлэх, инфляцийг тогтворжуулснаар иргэдийн бодит орлогыг хамгаалах, макро эдийн засгийн гадаад, дотоод тэнцвэрийг дэмжиж, санхүүгийн салбарын тогтвортой байдлыг хадгалах нь 2015 оны хувьд эн тэргүүний зорилт гэж Монголбанк үзэж байна..” хэмээн танилцуулсан юм.
Харин уг төслийн талаарх Эдийн засгийн байнгын хорооны санал дүгнэлтийг гишүүн С.Дэмбэрэл танилцуулж “ Төслийг хэлэлцэх явцад 2015 оны төсөв, мөнгөний бодлогын уялдааг хангах, 2015 оны мөнгөний бодлогын зорилт бүрийг хэрэгжүүлэх дэд хөтөлбөртэй, чамбай сайн бодлого байхаар өөрчлөн батлах, мөнгөний бодлогыг Хөгжлийн банк, Засгийн газрын үнэт цаас, өр зээлүүдтэй нягт уялдаатай авч үзэх, ханшийн тогтвортой байдал, бизнесийн цэвэр өрсөлдөөнд сөрөг нөлөөлж байгаа үнэ тогтворжуулах хөтөлбөрийн хэрэгжилтийг 2015 оноос эхлэн зогсоох, үнэт цаасны зах зээлийг идэвхжүүлэх, ирээдүйд чиглэсэн томоохон төслүүд дээр мөнгө босгоход анхаарлаа хандуулж ажиллах, инфляцийг хязгаарлах бодлогын шинэ арга, хэрэгслийг ашиглах” саналууд гарсан талаар онцолсон байна.