Ерөнхий сайд Н.Алтанхуягийн ахлах зөвлөх Л.Гансүхийн биеийн байдал муудсан гэх мэдээллийг бид хоёр хоногийн өмнө хүргэж байсан. Тэрээр Төв аймгийн урьдчилан хорих төвд саатуулагдаж байгаа бөгөөд хуурай өлсгөлөн зарлаад арав гаруй хонож байгаа юм.

    Хамгийн сүүлийн үзлэгээр түүний цус нь өтгөрч, цус бүлэлгүй болсон, хоёр бөөр үрэвссэн, зүрхний хэм алдагдсан гэсэн дүгнэлт гараад байгаа. Иймээс хорих ангийн эмч нар яаралтай эмнэлгийн тусламж авах ёстой гэсэн боловч АТГ-ын байцаагч нараас одоог хүртэл хариу өгөөгүй байгаа гэнэ. Хуурай өлсгөлөнгөө зогсоохгүй бол бие нь улам муудаж, амь насаа алдаж болзошгүй нөхцөл байдал үүссэн талаар эх сурвалжууд мэдээлж байна.

    Тэгвэл түүний нэр дээр Бээжингийн Яамэй эмнэлгээс энэ сарын 20-ны өдөр мэдэгдэх хуудас иржээ. Уг мэдэгдэлд “Манай эмнэлэг танд туссан зүрхний цус багадалт, зүрхний шигдээс өвчнийг гурван жил эмчилж илэрхий үр дүн гаргасан. Гэсэн ч өвчний байдал харьцангуй хүнд учраас шаардлагын дагуу 2-3 сар тутамд нэг удаа хавсарсан эмчилгээ хийлгэх шаардлагатай. Таны түрүүчийн удаагийн эмчилгээ 06 сарын 28-ны өдөр хийгдсэн байна. Одоо эмчилгээний завсарлах хугацаа дууссан тул ойрын өдрүүдэд цагаа зохицуулан манай эмнэлэгт ирж эмчилгээгээ хийлгэнэ үү. Бээжингийн Яамэй эмнэлгийн Хятад анагаах ухааны II тасгийн эмч, профессор Ма Зижоу” гэжээ.

    Л.Гансүхийг Шинэчлэлийн Засгийн газраас хэрэгжүүлсэн “Нүүрс” хөтөлбөрийн хөрөнгөнөөс 3.6 тэрбум завшсан хэргээр саатуулаад байгаа юм.