Монголын Улстөрд хэзээ ч хуучиршгүй од бол Н.Энхбаяр мөнөөс мөн. Н.Энхбаяртай холбоотой мэдээ, мэдээллийг сонин хэвлэлүүд шүүрэн авч, ард түмэн шимтэн уншиж, түүний алхам бүр нь олон нийтийн анхаарлыг одоо ч татсаар байгаа. Гэнэтийн бөгөөд сүр дуулиантайгаар энэ сарын 09-ний өдөр ирсэн экс Ерөнхийлөгч маань өчигдөр 18:00 цагийн үед эмчилгээгээ үргэлжлүүлэхээр Солонгос улсыг зорив.

    Монголд байсан 17 өдрийн дотор тэрээр Улстөрийг орвонгоор нь эргүүлчихээд буцлаа. Юуны өмнө тэрээр шударга ёс эвслийн бүлгийнхээ зарим сайд нарыг халж, сэлгэн нэлээд бужигнуулаад авсан. Тодруулбал Д.Тэрбишдагва, Ч.Улаан нарыг өөрт нь үнэнч байгаагүйн төлөө албан тушаалаас нь буулгав. Тэдний оронд томилох хүмүүсээ одоо ч эцсийн байдлаар шийдээгүй бөгөөд МАХН-ынхан эрх мэдэл, албан тушаалын дахин хуваарилалтаас болж хоорондоо нэлээд ширүүн авалцах болсон нь илчлэгдэв. Өнгөрөгч хоёр жилийн хугацаанд МАХН-ыг төлөөлж Засгийн газарт голлох жинтэй, гоцлох үүрэгтэй ажиллаж ирсэн хоёр сайдаа унагаж орхисон нь энэ намд багагүй хагаралыг авчраад байгааг эх сурвалжууд мэдээллэж байна. Эх сурвалжуудын мэдээллэж байгаагаар “Шударга ёс” эвсэл дотроо задарч, тунчиг түнжин муутай болсон гэнэ. Эвслийг бүрдүүлж байгаа МҮАН-ын дарга М.Энхсайхантайгаа Н.Энхбаяр уулзахгүй зугтсаар байгаад буцахын өмнөхөн “хальт” уулзаад салсан байна. Харин МАХН-ын дотор намын дарга Н.Энхбаярыг дэмжигчид хийгээд эсэргүүцэгчдийн шинэ эгнээ хэдийн бий болж хагаралдах боллоо.
    “Манай атаманыг яаж байнаа” гээд гүйгээд байдаг зуслангийн найзууд киноны жаалын дүр шиг О.Баасанхүү “манай даргыг яаж байнаа?” гэхээ гэнэт болчихов. Тэр ч бүү хэл Н.Энхбаярыг үдэж мордуулсан хүндэтгэлийн зоогт О.Баасанхүү, Д.Тэрбишдагва, Ч.Улаан, Л.Цог нарын өнгөрсөн хугацаанд тус намын гол төлөөлөгч болж ирсэн нэгдүгээр эгнээнийхэн ирсэнгүй.  Харин Н.Удвал, З.Баянсэлэнгэ, Г.Уянга, Г.Шийлэгдамба, Ж.Эрдэнэжамьяан тэргүүтэй хоёрдугаар эгнээнийхэн даргыгаа үдэж өгчээ. Эндээс МАХН-ын дарга Н.Энхбаяр намынхаа хоёрдугаар эгнээнийхэнтэй илүү дотно холбоо байгуулж, өөрт нь дайсагнаж, саад хийх магадлалтай нөхдөө буланд шахах ажлаа хийгээд буцсан гэдэг нь нотлогдож байгаа юм.

    Мөн Н.Энхбаяр энэ удаагийн ирэлтээрээ Ц.Нямдоржийн хэлдэгээр Ерөнхий сайд Н.Алтанхуягийн “хажуу бөөрөнд нэг сайн хутга бүлж” өгөөд явлаа. Тэрээр Н.Алтанхуягийн Засгийн газрын хувьзаяаг гартаа оруулсан шүү гэдгээ нотолж АН-ыг 2016 оны сонгуульд өөрөөс нь хамааралт байдлаар оролцуулах илбэ шидийн гэрээ хийж орхисон нь энэ Засгийн газрын хувьзаяаг тун хүнд байдалд оруулчихав. Зарим хүмүүс Н.Энхбаяр Аврах гэж ирээгүй, алах гэж ирсэн бололтой тэр үүргээ маш сайн гүйцэтгээд буцлаа гэж шивэр авир хийх боллоо. Хэрвээ Н.Алтанхуяг, Н.Энхбаяр нар гэрээ байгуулаагүй байсан бол улстөрийн нөхцөл байдал шал өөр байх байлаа. Харин АН-ын заналт дайснаар олон жил нүдлэгдэж явсан эрхэмтэйгээ гэнэт янагийн гэрээ байгуулж орхисон нь тус намын анхдагчид ялангуяа Э.Бат-Үүл тэргүүтэй нөхдүүдийн тэвчээрийг барж, намын даргаа солих эргэлт буцалтгүй тэмцлийн замд хөтлөөд явчихсан. Н.Энхбаяр ийнхүү өөрийнхөө намыг, АН-ыг ч нэг сайн самарч өгөөд буцлаа. Одоо түүний үлдээсэн ормон дээр ойрын өдрүүдийн улстөрийн тоглолт өрнөж, түүний зохиолын дагуу бүх жүжиг дэглэгдэхээр байна.