МАН-д хотын гэгдэх тодорхойлолттой намын дарга М.Энхболдыг тойрон хүрээлэгчдийн айхтар фракц бий. Хэдийгээр албан ёсоор ийм фракц байхгүй гэдэг ч МАН-ын хамгийн гол шийдвэрийг гаргаж, эрх мэдлийг атгалцаж явсан нэлээд эрхмүүд хотын удирдлагуудыг тойрсон хүрээллээс гаралтай байдаг. Том ахдаа үнэнч л бол ажлын чадвар сайн муу байх нь огт хамаагүй гэсэн зарчмаар эрх мэдэл албан тушаалыг хуваарилдаг тэднийг улстөрийн мафи гэж нэрлэх нь ч бий. МАН-ын 27-р Их Хурлаар тэд намын даргаар өөрсдийн толгойлогчоо сонгуулж дөнгөсөн. Энэ нь тэд нам доторх дэмжлэг сайтай гэхээсээ илүүтэй тамирдаж сарнисан намдаа цорын ганц зохион байгуулалттай бүлэглэл байж чадсантай нь холбоотой. Хотын фракц МАН-ын ялагдлын гол шалтгаан болсоор ирсэн хэрнээ  МАН-ын гол эрх мэдлийг үргэлж атгасаар ирсэн. Гэвч сүүлийн үед хотын фракцын байр суурь нам дотроо ганхаж эхэлсэн гэдгийг эх сурвалжууд мэдээллэж байгаа. Учир нь тэднийг холбож, эрх ашгийг нь нэгтгэж ирсэн Улаанбаатарын хотын хөрөнгө мөнгө, эрх мэдэл АН-ын гарт орсон. Хотын бүлэглэлийг бэхжүүлж байдаг эрх мэдэл, албан тушаалын бүтэц үгүй болсноор тэднийг эрх ашгаар нэгтгэх хөшүүрэг үгүй болж байна. Хэрвээ дараагийн сонгуульд нийслэлд МАН ялагдвал хотын фракц гэгч бүлэглэл тарж бутарна гэдгийг улстөрийн зурхайчид зөгнөх болсон. Мөн тус бүлэглэлийн толгойлогч М.Энхболдын эсрэг Н.Багабанди, С.Баяр, С.Батболд, У.Хүрэлсүх, Б.Дашёндон нар нэгдэл эрчимтэй хөдөлж эхэлсэн нь МАН дахь хотын фракцын байр суурийг улам ганхуулахад хүргээд байгаа гэнэ. Эх сурвалжуудын мэдээллэж байгаагаар У.Хүрэлсүх дараагийн намын даргын өрсөлдөөнд хэдийн сэтгэл шулуудсан бөгөөд түүнийг хамгийн ихээр дэмжиж байгаа хүн нь Монгол Улсын Ерөнхийлөгч асан Н.Багабанди ажээ. “У.Хүрэлсүх шиг зоригтой, эрсдэл хийх чадвар хүнд л найдвар бий” гэсэн битүү мессеж тусгаар тогтнолын ордноор нисэх болов.

    МАН-д хотын фракцын хувь заяа ийнхүү бүрхэг болж байгаа бол харин АН-д шинээр хотын фракц мэндэлж байгаа ажээ. Нийслэлийн засаг дарга бөгөөд Улаанбаатар хотын захирагч, Монгол Улсын баатар Э.Бат-Үүлийг дэмжигчид тойрон хүрээлэгчид өдрөөс өдөрт хүчээ нэгтгэн намынхаа бүх эрх мэдлийг гартаа оруулах зохион байгуулалттай хэлбэрт шилжиж эхэлсэн гэдгийг эх сурвалж мэдээллэж байна. Үүнээс дүгнэхэд Улаанбаатар хотыг захирах эрх мэдлийг гартаа авсан нөхөд нам дотроо хүчтэй бүлэглэл болж чаддаг нь тогтолцооны шинжтэй үзэгдэл бололтой. Эх сурвалжуудын мэдээллэж байгаагаар Э.Бат-Үүлийн тэргүүлсэн “Нийслэл фракц”-ыг албан ёсоор зарлаж магадгүй байгаа гэнэ. Энэхүү фракцад НИТХ-ын дарга Д.Баттулга, Н.Гантөмөр, С.Очирбат тэргүүтэй хотын томоохон эрх мэдэлтнүүд нэгдэх болсон гэнэ. Э.Бат-Үүлийн нийслэлд авч хэрэгжүүлж байгаа олон арга хэмжээ олон нийтээс нэмэх оноо цуглуулаад байгаа. Хэдийгээр хогны уут зэргийн шүүмжлэл дагуулсан олон асуудал дэгддэг ч түүний нэр хүнд гүн гүнзгийн унаагүй, тодорхой хэмжээнд рейтинг нь унавч эргээд маш хурдан сэргэдэг улстөрч гэдгийг судлаачид тайлбарлаж байна. Э.Бат-Үүлийн хэрэгжүүлж байгаа гэр хорооллын дахин төлөвлөлтийн ажил амжилттай хэрэгжиж чадвал тэр 2016 онд нийслэлд дахин тугаа мандуулж, цаашлаад 2017 оны Ерөнхийлөгчийн сонгуульд өрсөлдөх визаа олж авна. АН-д 2017 оны марафон эхэлж түүнд хөтлөгдсөн лидерүүд нь нэгнээ хатгаж, шөвөгдөөд эхэлсэн. Харин Э.Бат-Үүлийг 2017 оны марафонд сойх нийслэлийн фракцынхан нам дотроо нэлээд жинтэй, үүрэгтэй болон томорч болзошгүй байна. Нийслэлийнхэн юуны өмнө Н.Алтанхуягийг намын даргаас авч хаях хөдөлгөөнийг оройлон манлайлах болсон. Түүний дараа шинэ Ерөнхий сайд, Намын дарга хэн байх вэ? Гэдэг дээр нь нэгдмэл зохион байгуулалттай оролцохоор байна.

    Ийнхүү МАН-д хүчээ алдаж, эсэргүүцэлтэй тулж байгаа хотын фракц АН-д хүчээ авч, даль жигүүрээ дэлгэн нисэхэд бэлэн болжээ.