УИХ дахь бие даагчдын бүлэг мэдээлэл хийлээ. Энэ долоо хоногт байнгын хороо болон чуулганы нэгдсэн хуралдаанаар Аж ахуй нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийг хэлэлцэнэ.

УИХ-ын гишүүн Х.Болорчулуун уг хуулийн төсөлд 1.5 тэрбум хүртэлх борлуулалттай аж ахуйн нэгжүүдэд 90 хүртэлх хувийн татварын хөнгөлөлт үзүүлэхээр тусгасан гэдгээ энэ үеэр мэдэгдлээ.  Өөрөөр хэлбэл 10 хувийн татвар төлдөг  байсан жижиг аж ахуйн нэгжүүд нэг хувийн татвар төлдөг болох юм. Гэхдээ уг татварын хөнгөлөлтөд архи, тамхи, нефт болон уул уурхайн компаниуд хамаарахгүй юм байна. Тиймээс УИХ дахь бие даагч гишүүд  бага орлоготой аж ахуйн нэгжүүдэд татварын хөнгөлөлт үзүүлэх зорилготой Аж ахуй нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийг дэмжиж буй аж. Манай улсад нийтдээ 60 мянга орчим аж ахуй нэгжүүд байдаг бөгөөд үүний 30 мянга орчим нь энэхүү татварын хөнгөлөлтөд хамрагдах юм байна. 

Ингэж олон компаниудыг татварын хөнгөлөлтөд хамруулах нь эргээд улсын эдийн засагт орох орлого буурах магадлалтай гэж зарим гишүүд үзэж буй. Гэхдээ ингэх нь аж ахуйн нэгжийн цаашдын үйл ажиллагаанд сайнаар нөлөөлж эргээд улсын нийт татварын орлогод эзлэх хувь нь ихэснэ хэмээн үзэж байгаа ажээ.

Түүнчлэн жижиг аж ахуйн нэгжүүд татварын орлого төдийлөн их төлдөггүй ч ажлын байр ихээр бий болгодог байна. Тиймээс  дээрх хуулийн төслийг хэрэгжүүлэх нь манай улсын эдийн засагт эерэг нөлөөтэй гэлээ.