УИХ дахь бие даагч гишүүд болох Ц.Даваасүрэн, Х.Болорчулуун, С.Ганбаатар нар мэдээлэл хийлээ.

Бие даагч гишүүд энэ долоо хоногт Засгийн газрын бүтэц бүрэлдэхүүн болон сайд нарын асуудлыг яаравчлан шийдэх хэрэгтэй хэмээн үзэж байгаа аж. Учир нь Засгийн газрын бүтцийг шийдсэний дараа ирэх оны төсөв болон өвөлжилтийн бэлтгэл байдлын талаар ярилцах боломжтой гэв. Энэ долоо хоногт байнгын хороо болон чуулганаар хэлэлцэх Соёлын тухай хуулийг бие даагч гишүүд дэмжиж байгаа гэдгийг Ц.Даваасүрэн гишүүн хэллээ. Энэ хуулинд тусгасан “Монгол кино” нэвтрүүлгийг төрөөс дэмжиж иргэдэд хүргэх асуудал нь хамгийн чухал гээд сүүлийн үед телевизүүдээр ихээр гарах болсон Солонгосын олон ангит киноноос болж  манай улсын уламжлалт ёс заншил устах асуудал тулгарч байна гэсэн юм.

Мөн Нийгмийн бодлого, боловсрол, соёл, шинжлэх ухааны байнгын хороо болон чуулганы нэгдсэн хуралдаанаар Малчдын тэтгэврийн даатгалын шимтгэлийг нөхөн төлүүлэх тухай хуулийн төслийг хэлэлцэх юм. Уг хуулийн төслийг Ц.Даваасүрэн нарын нийт 18 гишүүн өргөн мэдүүлсэн байна. Хуулийн төсөлд 1990 -2005 оны хугацаанд даатгал төлж чадаагүй малчдын даатгалыг нөхөн төлүүлэхээр заасан аж. Хууль санаачлагчдын нэг Ц.Даваасүрэн гишүүний хэлснээр Төрөөс малчдын талаар баримтлах бодлогыг баталж байх үед  нийт 160 мянган малчин өрх байсан бол одоо 145 мянга болж буурсан.  Мал аж ахуй нь эдийн засгийн тогтвортой байдлыг хангах хамгийн чухал зүйл учраас малчдын нийгмийн даатгал болон тэдэнд олгох тэтгэвэр тэтгэмжид анхаарах хэрэгтэй гэсэн юм.

Уг мэдээллийн үеэр С.Ганбаатар гишүүн 130 сая ам.долларын татварыг 30 сая.ам доллар болгож бууруулсан “Оюутолгой” компани болон үүнтэй холбогдох татварын зарим байцаагч нарыг АТГ-т өгсөн гэдгийг хэллээ. Үүнээс гадна Оюутолгой компаний тайланд хийсэн шалгалтыг “нууц” хэмээн үзүүлэхгүй байгаа нь УИХ-ын гишүүнхий бүрэн эрхэд халдаж буй хэрэг гэсэн юм. УИХ-ын гишүүн С.Ганбаатар өнгөрсөн хоёр долоо хоногийн турш Оюутолгойтой холбоотой дээрх асуудлаар холбогдох ажлын хэсэгтэй уулзаж мэдээлэл сонссон боловч дорвитой хариу хэлээгүй учир ийнхүү АТГ-т ханджээ.