УИХ дахь АН-ын бүлэг өнөөдрийн хуралдаанаараа хоёр асуудлыг хэлэлцжээ. Нэгдүгээрт, өнгөрсөн долоо хоногт улс төрийн хүрээнд дуулиан тарьсан үйл явдлуудын талаар Ерөнхий сайдаас мэдээлэл сонссон байна. Харин дараа нь 2015 оны төсвийн төсөлтэй холбогдуулан Сангийн яамны мэдээллийг сонсчээ.

Өнгөрсөн долоо хоногт Ерөнхий сайд Н.Алтанхуяг болон МАХН-ын дарга Н.Энхбаяр нарын гарын үсэгтэй АН-МАХН-ын хооронд хийсэн нууц гэрээ гэх зүйлийг хуурамчаар үйлдэн олон нийтэд тараасан мэдээлэл ихээхэн дуулиан тарьсан. Харин энэ хуурамч гэрээг нь МАН-ын олон нийттэй харилцах албаны ажилтан Н.Дэмбэрэл үйлдсэн гэдгийг Тагнуулын Ерөнхий газраас шалгаж тогтоосон билээ.

Тэгвэл гэрээг хуурамчаар үйлдсэн этгээдэд хуулийн хариуцлага ноогдуулах ёстой гэж тус бүлэг үзсэн байна. Тиймээс холбогдох газруудад нь гомдол гаргаж уг асуудлыг бүрэн шийдвэрлүүлэхээр болжээ. Цаашид монголчуудыг хагалган бутаргах гэсэн ийм ёс зүйгүй, увайгүй улс төр хийхээ болихыг тус бүлгийн дарга Д.Эрдэнэбат шаардлаа. Мөн УИХ-ын гишүүдийн өмнөөс худал мессеж бичиж тараасан үйл явдлыг даруй нягталж эзнийг нь олох ёстой гэдэг дээр тус бүлэг саналаа нэгтгэж ТЕГ-т хандахаар болсон байна.

Мөн “АН-ын 15 гишүүн Ерөнхий сайд Н.Алтанхуягийг огцруулахаар гарын үсгээ зуржээ” гэх мэдээлэл хэвлэл мэдээллийн хэрэгслээр тараад байгаа. Тэгвэл энэ асуудлыг тус бүлэг мөн авч хэлэлцсэн байна. Бүлгийн хуралдааны үеэр УИХ-ын гишүүн Ц.Болор “Би гарын үсэг зураагүй. Зураагүй байхад зурсан гээд бичсэн байгаа зүйлийг шалгаж өгнө үү” гэх хүсэлтийг бүлгийн даргадаа тавьжээ.

Мөн ирэх 2015 оны төсвийн төслийг хэлэлцээд энэ асуудлаар ажлын хэсэг гаргахаар болжээ. Учир нь төсвийн төсөлтэй холбоотой маш олон санал гомдол гарч байна гэв. Зарим улс төрийн хүчин ч уг хуулийн төслийг хэлэлцэхээс татгалзаж байгаа. Тиймээс ажлын хэсэг гаргаж дахин нягтлуулахаар болсон гэлээ. Гэхдээ ирэх оны төсвийн төсөл нь байгаа мөнгөндөө таарсан төсөл болсон гэж тус бүлэг үзэж байгаа аж. Хотын дарга Э.Бат-Үүлээс эхлээд зарим сайдууд төсвийг орон нутгийн мэдэлд шилжүүлэхийг эсэргүүцэж байгаа. Тиймээс энэ асуудлыг дахин ярилцахаар тохирчээ. Мөн царцаасан барилгуудыг ашиглалтад оруулах боломжгүй гэдгийг тус бүлгийн дарга Д.Эрдэнэбат хэллээ. Ер нь цаашид “Тавантолгой”-д менежмэнтийн хувьчлал явуулах мөн Оюутолгойн далд уурхайн асуудлыг шийдвэрлэх, төмөр замаа тавьж байж мөнгөө олж санхүүгийн асуудлаа шийдвэрлэнэ гэж тус бүлэг үзэж байгаа аж.  Тавантолгойн менежмэнтийн хувьчлал явуулах тендерийн ажлыг эхлүүлсэн бөгөөд удахгүй дүн нь гарах юм байна.