Засгийн газарт томилогдох сайд нарын асуудал хүлээлт үүсгээд байна. Үүнээс гадна өнгөрсөн долоо хоногт  Төрийн байгуулалтын байнгын хорооны хуралдаанаар  УИХ-ын гишүүн Д.Хаянхярваа нарын  28  гишүүний УИХ -д өргөн мэдүүлсэн  Ерөнхий сайдыг огцруулах тогтоолын төслийг хэлэлцэх байсан ч “Шударга ёс” эвслээс ажлын тав хоногийн завсарлага авснаар уг асуудал энэ долоо хоногийн лхагва гариг хүртэл хойшилсон. Үүнээс үүдэн  Засгийн газрын гишүүдийг томилох  асуудлыг эхлээд хэлэлцэх үү, Ерөнхий сайдыг огцруулах асуудлыг эхлээд хэлэлцэх үү гэх асуулт гарч   ирээд байсан юм. Тэгвэл энэ  асуудлаар даргын зөвлөл хуралдаад эхлээд Н.Алтанхуягийг огцруулах асуудлыг хэлэлцээд араас нь сайдуудын  томилгоог хэлэлцэхээр болжээ. Тодруулбал аравдугаар сарын 29 -ний 09 цагаас Төрийн байгуулалтын  байнгын хороогоор Ерөнхий сайдыг огцруулах тухай асуудлыг хэлэлцээд тухайн өдрийн 14.00 цагаас  Төсвийн байнгын хорооны хуралдаанаар Засгийн газрын гишүүнийг томилох асуудлыг хэлэлцэхээр болсон байна. Аравдугаар сарын 30-ны Чуулганы хуралдаан эхлээд Ерөнхий сайдыг огцруулах асуудал, дараа нь Засгийн газрын гишүүнийг томилох асуудал гэсэн дарааллаар үргэлжлэх юм байна.