Өнгөрсөн долоо хоногт Эрүүл мэндийн сайд Н.Удвал Нийгмийн бодлогын байнгын хорооны хуралдаанд оролцохдоо дэд сайд Ж.Амарсанааг элэгний С вирусийн 900 ам.долларын үнэтэй эмийг 1800 ам.доллараар оруулж ирэхээр болсон, элэгний өвчтэй хүмүүсийг ажлынхаа өрөөнд бүртгэдэг. Элэгний С вирустай хүний зовлонгоор бизнес хийж байна хэмээн ярьсан нь олны анхаарлыг татаад байсан юм.
           Тэгвэл энэ талаар Эрүүл мэндийн дэд сайд хариулт өгчээ. Тэрээр “Н.Удвал сайд байнгын хорооны өндөр хариуцлагатай тийм хурал дээр хариуцлагагүй, хүнийг гүтгэсэн , буруу мэдээлэл өгсөнд харамсч байна. Хоёрдугаарт, бухимдаж байна. Гуравдугаарт, даанч дээ гэж бодож байна. Энэ салбарыг тэргүүлж байгаа сайд хүн шүү дээ. Тэр хүнд хангалттай мэдээлэл авах боломж байсан. Зөв мэдээлэл өгөх, ёс зүйтэй хандах бүх боломжууд тэр хүнд байсан юм. Гэтэл буруу мэдээлэл цацаж, хүнийг гүтгэн ёсзүйн том алдаа хийчихээд сууж байгааг нь харахаар арай л хэтэрхий юм гэж бодогдож байна. Н.Удвал сайдын хэлсэн үгэнд үнэн үг алга” гэсэн байна.
       Нэг салбарт хамтдаа ажиллаж, нэгэн үзүүрт сэтгэлээр хандах ёстой сайд, дэд сайд хоёрын ам ажил иймэрхүү байдалтай зөрж, нэг нэгэндээ итгэхгүй байгаа нөхцөлд Эрүүл мэндийн салбараас чанар, сайн үр дүн хүлээнэ гэдэг хэцүүхэн болж байгаа бололтой. Иргэд чухам хэнд нь итгэх эсэхээ мэдэхгүй болчихлоо.