Ерөнхий сайд Н.Алтанхуягийг огцруулах асуудал олон нийтэд хүлээлт үүсгээд байна. Түүнийг огцруулах тогтоолын төслийг МАН –ын бүлгээс Их Хурлын даргад өргөн барьсан. Уг асуудлыг байнгын хороогоор хэлэлцэх үед “Шударга ёс” эвслээс ажлын тав хоногийн завсарлага авсан. Тэрхүү завсарлага нь лхагва гарагт дуусгавар болно. Тэдний завсарлага авсан шалтгааныг Ардчилсан намд туслаж буй хэрэг гэж зарим хүмүүс үзэж байгаа. Үүнээс гадна “Ерөнхий сайдыг АН –ын гишүүд өөрсдөө огцруулах гэж байна. 10 гаруй гишүүд огцруулах тогтоолын төсөлд гарын үсэг зуржээ” гэх мэдээлэл өнгөрсөн өдрүүдэд хэвлэлээр хөвөрлөө. Энэ талаар АН –ын бүлгийн дарга Д.Эрдэнэбат дараах тайлбарлыг хийжээ. Тэрээр “Гишүүдийн нэрс сонин хэвлэлээр гарсан байсан. Тэдгээр гишүүдээс өөрөөс нь үнэн худлыг нь лавласан нь дээр байх. Худал мэдээлэл гишүүдэд түгээх нь сайн зүйл биш. Ерөнхий сайдыг огцруулах кнопыг дарна гэдэг нь Ардчилсан намыг буудахтай адилхан сонсогдож байна гэдгийг гишүүддээ хэлж байгаа” гэжээ.
         Н.Алтанхуягийн тэргүүлсэн Засгийн газар эдийн засгийн хямралаас болоод дээсэн дөрөө дээр дэнчигнэж яваа. Сөрөг хүчний зүгээс удаа дараалан түүнийг огцруулах саналыг УИХ –д өргөн мэдүүлсэн ч намын нөхөд нь түүнийг цээжээрээ хамгаалан авч үлдсээр байсан. Харин Н.Энхбаяртай байгуулсан хамтран ажиллах гэрээнээс болж намын нөхдийнхөө итгэлийг алдаж,  хатуухан зэмлэл хүртэж яваа. Түүнийг огцрох эсэхийг ирэх лхагва гарагт шийдэгдэх болно.