1. Ерөнхий сайд Н.Алтанхуягийн хийсэн Эдийн засгийн хөгжил, Зам тээвэр, Эрчим хүчний яамдыг бусад яамдад нэгтгэх мэдэгдэл нь гэнэтийн бөгөөд чухал санаачлага байлаа. Их бүтээн байгуулалтыг санхүүжүүлэх хөрөнгө босгох, нийслэлийн зам уулзваруудыг засах шинэчлэх болон аймгуудыг холбосон зам барих, эрчим хүчний шинэ эх үүсвэр бий болгох гэх мэт түүхэн үүргээ шинээр байгуулагдсан яамд сайн гүйцэтгэлээ. ШЗГ эдгээр салбарыг онцлон үзэж шинэ яамд байгуулсан, нэгэнт тавьсан зорилтоо биелүүлсэн бол өөр яамдтай нэгтгэн Засгийн газрын бүтэц бүрэлдэхүүнийг цомхон болгохыг зорих нь зөв. Ардчиллын 24 жилийн түүхэнд Ерөнхий сайд хуульд заасан бүрэн эрхээ эдэлж өөрийн санаачлагаар ЗГ-таа халаа сэлгээ хийж байгаа анхны тохиолдол энэ боллоо, Ерөнхий сайдын энэ алхам улс төрд зөв жишиг тогтоож байна.

    2. Засгийн газрын шинэ бүтэц бүрэлдэхүүний асуудлыг УИХ-аар хэлэлцүүлж байгааг зориуд сөргүүлэн Ерөнхий сайдыг огцруулах саналыг МАН-ын бүлгээс оруулсан нь төр засгийн хэвийн үйл ажиллагааг сатааруулж улс төрийн ашиг хонжоо гаргах гэсэн санаархал мөн. Ерөнхий сайдыг огцруулах саналыг МАН-ын бүлгээс удаа дараалан оруулж ирээд байгаагийн цаад зорилго нь улс төрийн тогтворгүй байдал бий болгож эрх баригчдын үйл ажиллагаа болохгүй байгаа мэтээр олон нийтэд ойлгуулах гэсэн оролдлого гэж үзэхээр байна. МАНАН байгуулахаас татгалзсан Н.Алтанхуягт МАН-ын удирдлага хонзогносон байдлаар хандаж байгаа нь нууц биш. Тэгээд Н.Алтанхуягаас муу хүн алга болсон бололтой. Ерөнхий сайдыг элдвээр гүтгэж доромжлох арай дэндлээ. Ерөнхий сайд Н.Алтанхуягийг хийсэн ажилтай, хэлэх үгтэй сайн улс төрч гэж “Шударга ёс” бүлгэм үнэлж байгаа. Шүүмжлэл байх зүйл, гэхдээ дан хараар будаад байх нь улс төрийн соёлгүй хэрэг.

    3. АН, МАХН-ын гэрээг элдэвээр баалж байна, МАНАН гэдэг буруу нэгдэлээс сэргийлсэн сайн тал ч байгаа. Энэ гэрээ эдгээр намын дотоод хэрэг боловч 2012 оны иргэдийн сонголтыг баталгаажуулсан, Үндсэн хуульд нийцсэн баримт бичиг гэдэг талаас харах хэрэгтэй. Гэрээг эсэргүүцэж байгаа АН-ын зарим УИХ-ын гишүүнд МАН-тай хамтарсан Засгийн газар байгуулах бодол ч байх шиг. Хоёр том нам өвөр түрийндээ орж, хамтарч засаглаад байх юм бол Монголд сонгууль гэдэг юм хийх хэрэг байхгүй. МАН-ын хэлтсийн дарга, ажилтнууд “Нууц гэрээ” гэгч бичиг хуурамчаар үйлдсэн нь илэрч шившгээ дэлгэлээ. Бусад намууд хоорондоо гэрээлсэн дотоод асуудал МАН-д ер нь ямар хамаа байнаа?! “Бусад намын харилцааны асуудал бидэнд хамаагүй” гэж МҮАН-ын дарга М.Энхсайхан мэдэгдсэн байсан, МАН-ынхан олж уншаасай. МАН-ын Ерөнхий нарийн бичгийн дарга Ж.Мөнхбатын ил захидалд Ерөнхий сайдын албан тушаалын нэрийг хүртэл урвуулан доромжлоод зогсохгүй, АН-ын бүлэгт завсарлага авахгүй байхыг хүртэл тулган шаардсан байх юм. Төр засгийн хэвийн үйл ажиллагааг бусниулан сарниулах гэсэн МАН-ын увайгүй үйлдэл хэрээс хэтэрч байна.

    4. МАХН, МҮАН, ИЗН зэрэг намууд АН-тай байгуулсан эвсэлийн гэрээндээ үнэнч байгаа нь сайшаалтай. Одоо сонгууль болохын хооронд Ерөнхий сайдыг огцруулбал, Засгийн газар бүрэн бүрэлдэхүүнээрээ огцорно. Төр засгийн тогтворгүй байдал гаарч, эдийн засгийн хямрал улам даамжирна. Сайдын суудалд санаархагчдад сайхан далим болох байх, горыг нь ард иргэд амсана. Ерөнхий сайдыг огцруулдаг юм гэхэд УИХ-д хамгийн суудалтай намын дарга Ерөнхий сайд байх жишиг юу болох вэ. Улс төрийн намыг намын дарга төлөөлөх бүрэн эрхтэй, хамгийн олон суудалтай АН-ыг намын дарга биш хүн төлөөлөх болж байна уу? 1998 онд Ц.Элбэгдоржийн Засгийн газар огцорч, удаан хугацаанд Үүрэг гүйцэтгэгчээр ажилласан тэр түүх ч давтагдах аюултай! Шинэчлэлийн Засгийн газрын үйл ажиллагааг жирийн иргэд, эвсэлд багтсан намуудын жирийн гишүүдийн ихэнх нь үнэлж дэмжиж байгаа. Төр түвшин, түмэн олон амгалан байг!

“Шударга ёс” бүлгэм