Энэ долоо хоногт МАН-ын бүлгийн хурлын дараа УИХ-ын гишүүн Д.Оюунхорол мэдээлэл хийхдээ “ТЕГ-ынхан улс төрийн ажил хийдэг боллоо. Хууль бусаар МАН-ын байранд нэвтэрч эд зүйлсийг хураасан. Өөрсдийн харьялалын бус хэргийг улс төрийн даалгавараар шалгасан. 1996-2000 оны хооронд ардчилалынхан Засгийн эрхэнд байхдаа тухайн үеийн цөөнхөө тагнаж байгаад баригдсан. Тэгээд ТЕГ-ын дарга нь огцорч байсан. Түүх давтагдаж байна. Тиймээс ТЕГ-ын удирдлага, зарим ажилтнуудыг холбогдох газруудаар шалгуулахаар бэлдэж эхэлсэн” тухай мэдээлсэн. Тэр зүгээр ч нэг сануулга маягаар яриагүй байна. МАН-ынхан хэлсэндээ хүрч ТЕГ-ын дарга Б.Ариунсан болон гүйцэтгэх ажиллагаа явуулсан ажилтнуудыг шалгуулахаар АТГ-т ханджээ. Тэгэхдээ хууль бусаар гүйцэтгэх ажиллагаа явуулсан, өөрийн харьялалын бус хэрэг шалгасан, өмч хөрөнгө хураасан, Монгол Улсын нүд чих болох учиртай газар улс төрийн албан тушаалтны заавараар улс төрийн мөрдөх товчоо болсон тухай олон ноцтой зүйлийг бичсэн мэдээлэл ирлээ. Энэ талаар АТГ-ын эх сурвалжтай холбогдоход “Тиймэрхүү утгатай зүйл ирсэн. Шалгаж нягтлах шаардлагатай. Шалгасны эцэст МАН-ын албан тоотод дурдагдсан зүйлс үндэслэлтэй эсэхийг тогтооно. Тиймээс нарийн тодорхой мэдээлэл өгөх боломжгүй” гэж тайлбарлав.

    Мөн МАН-ынхан цагдаа, прокурорын байгууллагад ч хандаж ТЕГ хууль бус үйл ажиллагаа явуулсан гэж гомдол гаргасан байна. Тэгэхдээ хэрэгт буруутгагдаж байгаа хүнээс огтхон ч мэдүүлэг аваагүй. Ажилтнуудыг шөнийн цагаар дуудаж, эрүүдэн шүүх байдлаар дарамталж яриулаад, түүнийгээ намын эсрэг ашиглан хэвлэл мэдээллийн хэрэгсэлээр гүтгэлэгийн шинжтэй хэвлэлийн бага хурал хийсэн. Энэ нь олон хууль зөрчсөн гэж тайлбарласан тухай яригдаж эхэллээ.

    Тэгэхээр МАН-ынхан зүгээр суухгүй хөдөлж эхэлсэн байна. Тэдний гомдол, албан тоотод дурдагдсан зүйлс нотлогдохгүй, хууль зөрчсөн гэдэг нь тогтоогдохгүй бол асуудал тэгсхийгээл өнгөрөх байх. Харин хууль зөрчсөн нь батлагдаж,  яриад байгаа зүйлс нь үндэслэлтэй бол ихээхэн маргаан, тэмцэлийг өрнүүлэх нь гарцаагүй. Үүний зэрэгцээ ТЕГ-ын нэр хүнд ч ихээхэн унаж байна. Сэтгүүлчид, жиргээчид, УИХ-ын гишүүний туслахыг байцаасан. Энэ талаар одоо болтол нарийн тодорхой мэдээлэл өгөөгүй. Зарим сэтгүүлчид нь гомдолын шинжтэй зүйлс бичиж УИХ-ын гишүүдэд өгсөн гээд асуудал хөвөрч байна. Тэгж байтал дуулиант мессежний эзнийг тогтоогоогүй. Энэ талаар яаран сандран мэдээлэл хийгээгүй. Тэгсэн мөртлөө сөрөг хүчний байранд шөнө дөлөөр нэгжлэг хийж, үйлдсэн гэх этгээдтэй нь уулзаагүй байж яаран сандран хэвлэлийн бага хурал хийсэн нь ихээхэн асуудал дагуулах магадлалтай боллоо. МАН-ын хашир туршлагатай улс төрчид асуудлыг ингээд намжаахгүй. Сайтар мухарлах ёстой гэж өөр хоорондоо ярилцах болсон байна. Тэд ТЕГ-ын удирдлагыг мэргэжлийн биш улс төрч хүнийг томилохоор ийм байдалд хүрдэг гэж мэдээлээд эхэлсэн нь асуудлыг зүгээр өнгөрөөхгүй гэдгийн дохио боллоо.