Яг одоо чуулганы хуралдаанаар 2015 оны Төсвийн тухай хуульд өөрчлөлт оруулах тухай хуулийн төслийг хэлэлцэж байна. Төсвийн хуулийн өөрчлөлттэй холбоотойгоор Боловсролын тухай өөрчлөлт оруулахаар төлөвлөсөн. Тодруулбал, нэг сурагч бүрээр бодож төрөөс сургуульд өгдөг татаасыг ялгамжтай өгөх тухай. Ингэхдээ тухайн сургуулийн сургалтын төлбөртэй уялдуулан 20-80 хувь хүртэл таван үе шаттайгаар бууруулж, 2015 оны төсвийн төсөлд тооцсон санхүүжилтийг 1.6 тэрбум төгрөгөөр бууруулахаар болжээ. Одоо санхүүжилт авч буй сургуулиудын 80 хувь нь хэвээр хувьсах зардлаа авах бол, таван саяас дээш төлбөртэй сургуулиудад 60 хувийн татаас, 10 саяас дээш төлбөртэй сургуулиуд 20 хувийн татаас өгөх юм.

Харин МАН-ын гишүүдийн зүгээс уг асуудлыг эсэргүүцэж “Боловсролын салбарт хөрөнгө оруулж буй хувийн хэвшлийнхнийг ялгаварлан гадуурхаж байна. Бид Монголын ирээдүйг авч явах хүүхдүүдийнхээ  ирээдүйд ингэж хандаж болохгүй. Энэ нь тус салбарт хувийн хөрөнгө оруулалт хийх сонирхлыг үгүй болгож байна. Үндсэн хуулийн зөрчил ч гарч болохоор байна” гэлээ.

Харин Ерөнхий сайд Н.Алтанхуяг “Арван саяын төлбөртэй сургуульд өгдөг мөнгө гэр хорооллын сургуульд өгдөгтэй адил байгааг өөрчлөхөд юу нь болохгүй байгаа юм бэ. Төлбөрийнх нь хэмжээнээс хамааруулаад ялгаатай өгөх нь Үндсэн хууль зөрчихгүй шүү дээ” хэмээсэн юм.