Байнгын хорооноос оруулж ирсэн Монгол Улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай хуулийн төслийн анхны хэлэлцүүлгийг УИХ –аар хийлээ. Гишүүд хуулийн төсөлтэй холбоотой асуултуудыг хууль санаачлагчид болон холбогдох яамны төлөөллөөс асуусан юм.
УИХ –ын гишүүн Ё.Отгонбаяр:  “Эдийн засаг сайжрих хандлага ажиглагдахгүй байна. Олон аж ахуй нэгжүүд хаалгаа барьж байгаа.  Албан байгууллагууд цалингаа тавьж чадахгүй байна. Р.Амаржаргал Ч.Хүрэлбаатар гишүүд байнгын хороон дээр ярьсан протколыг харахад сангийн яамнаас бичсэн тооны үндэслэлүүд худлаа байна гэж хэлжээ. Надад энэ их ноцтой санагдаад байх юм. Жилийн жилд төсөв хэлэлцэх болохоор л ухаан орсон юм шиг Сангийн яам, Эдийн засгийн хөгжлийн яам, Засгийн газар гурав одоо тоонуудаа нэг мөр болгомоор байна гээд гүйх юм. Үүнийгээ эртхэн шийдмээр байна. Гадаадын өрийг тойрсон олон янзын тоо баримтууд яваад байна. Байнгын хорооноос үүнийг ажлын хэсэг гаргаад шалгаж болохгүй юм уу. Яамныханд дарга нар нь хоёр метр өндөр, нэг метр өргөн хүн хийгээд ир гээд үүрэг өгдөг байх. Гэтэл Сангийн яаманд ийм хүн байдаггүй юм аа гээд хэлчих зориг байдаггүй юм байна. Дэлхийн банк, Азийн хөгжлийн банк тооцоолохоор өрийн хэмжээ нь ДНБ-ийн 40 хувиас давчихаад байдаг, гэтэл Сангийн яам нь тооцоолохоор багтаагаад байх юм” гэв.
Сангийн яамнаас дараах хариултыг өглөө. “Өр тооцсон аргачлал дээр олон улсын байгууллагатай зөрөөтэй. Олон улсын хувьд Монголбанкны тавьсан өрийг улсын өр хэмээн тооцдог юм билээ. Аргачлал нь өөр учраас хариу нь өөр гарч байгаа зүйл бий” гэсэн юм.
Ингээд төсвийн тухай мэдэгдэл, төсөөллийн өөрчлөлтийг нийт гишүүдийн 44,8 хувийн саналаар дэмжсэнгүй. Тиймээс нэмэлт өөрчлөлт оруулахгүйгээр хуучин тоо баримтаар явахаар боллоо.